Þetta kemur fram í tilkynningu frá CCEP, en mbl greindi fyrst frá málinu. Málið snýr að viðbrögðum starfsmanna KSÍ vegna kynferðisbrots leikmanns karlalandsliðsins sem leiddi meðal annars til afsagnar Guðna Bergssonar, formanns KSÍ, í gær.
Í tilkynningu CCEP segir að síðustu áratugi hafi Coca-Cola á Íslandi verið stoltur stuðningsaðili íslenskrar knattspyrnu í gegnum grasrótarstarf íþróttafélaga og samstarf við Knattspyrnusamband Ísland. Coca-Cola á Íslandi hafi stutt við starf sambandsins gagnvart öllum aldurshópum og kynjum.
„Vegna frétta síðustu daga sjáum við ástæðu til að lýsa yfir þungum áhyggjum af stöðu þessa stærsta íþróttasambands í íslensku samfélagi.
Coca-Cola á Íslandi hefur sent bréf þess efnis til KSÍ þar sem óskað er eftir samtali um þessi mál og kynningu á aðgerðaáætlun KSÍ í þessum málaflokki.
Vonandi auðnast KSÍ að vinna úr þessum málum til að auka janfrétti, útrýma ofbeldi og skapa þannig bjarta framtíð fyrir íslenska knattspyrnu með það að leiðarljósi efla sjálfstraust og hæfni ungs fólks til framtíðar í gegnum knattspyrnuna,“ segir í tilkynningu CCEP.
