Sigur­partýið lét aðrar kosninga­vökur líta út eins og fermingar­veislur

Sjálfstæðisflokkurinn: Allt er vænt sem vel er blátt? 

Sjálfstæðisflokkurinn var kannski með flottustu veitingarnar og mörg hundruð stuðningsmenn í sínu fínasta pússi, en náði þó ekki að toppa trylltu stemninguna sem myndaðist á kosningavöku Framsóknarflokksins.. 

Sjálfstæðisflokkurinn tók bláa þemað alla leið í kosningavöku sinni á Hilton hótelinu á Suðurlandsbraut eins og þeim einum er lagið. Meira að segja bjór- og vínflöskur voru valdar út frá bláum merkingum.

Það skal tekið fram að Sjálfstæðismenn skemmtu sér samt mjög vel. Stemningin í kosningavöku Sjálfstæðisflokksins var samt frekar sérstök, ekki síst þar sem fólk virtist oft fagna meira óförum annarra flokka en góðu gengi eigin flokks.

Sigurbjörn Magnússon, faðir dómsmálaráðherra, og Brynjar Níelsson, sem er að jafna sig eftir rafskútuslys fyrir nokkrum dögum voru í góðum gír. 

Brynjar datt úr af þingi þegar síðustu tölur í síðasta kjördæminu urðu ljósar nú rétt eftir klukkan níu í morgun.

Bjarni klappaði en hélt yfirvegun þegar allra fyrstu tölurnar voru lesnar upp. Sjálfstæðisfólkið í salnum fagnaði ákaft.

Flokkur fólksins: Persónulegasta stemningin

„Hvar er kaffi Flokk fólksins“ spurði eldri maður mig á tómu og dimmu bílaplani Grafarvogskirkju, sem er kannski skiljanlegt því kosningavakan var vel falin í kjallara kirkjunnar og bílarnir á bak við.

Gestir voru flestir að drekka kaffi eða appelsín svo það var lítið um fyllerí eða læti hjá stuðningsfólki Ingu Sæland. Viðburðurinn minnti frekar á kaffi eldri borgara og var hvergi hærri meðalaldur en í kosningavöku Flokks fólksins.

Stemningin var mjög heimilisleg og gott dæmi um það var að formaður flokksins skildi símann sinn bara eftir á borðinu í anddyrinu á meðan hún spjallaði við stuðningsfólk. 

Söng hún meðal annars brot úr laginu Slá í gegn en Ingu leiðist ekki að syngja.

Inga  viðurkenndi í samtali við blaðamann um ellefuleytið að hún væri nú orðin mjög þreytt, en átti þá eftir að kíkja í heimsókn bæði í kosningasjónvarp Stöðvar 2 og RÚV. Hún brosti þó hringinn og sagðist ótrúlega ánægð. 

Á Sprengisandi í morgun sagði Inga: „Nóttin í nótt sýnir að okkur er treyst.“

Viðreisn: Vel heppnað pílukvöld

Viðreisn hélt ótrúlega gott partý í JL húsinu. Stuðningsmenn drukku saman bjór og spiluðu pílu og stemningin var virkilega góð. 

Þorgerður Katrín var nokkuð sátt þó að hún hefði auðvitað vilja fleiri þingmenn inn. Viðreisn bætti þó við sig manni og hafði nógu að fagna á kosningavökunni.

Píratar: Yngsti þingmaðurinn orðlaus og hissa

Píratar skemmtu sér saman á Ægisgarði úti á Granda. Píratar héldu sínum sex þingmönnum og var mjög góð stemning hjá Pírötum.

Hópurinn var þéttur og samheldinn og stuðningsmenn voru með merki flokksins húðflúrað eða málað á sig á ýmsum stöðum.

Píratar áttu klárlega stílhreinustu skreytingarnar, einfaldar hvítar hauskúpur á svörtum fánum um allt.

Píratar héldu það gott partý að við hefðum alveg getað hugsað okkur að stoppa lengur, en þar sem við þurftum að heimsækja öll tíu kosningapartýin á einu kvöldi þurftum við að halda okkur við efnið.

Stjarna kvöldsins var án efa Lenya Rún Taha Karim, nýr þingmaður Pírata í Reykjavíkurkjördæmi norður. Hún er aðeins 21 árs og sú yngsta sem er kjörin beint inn á þing.

Vinstri grænir: Þakið ætlaði af Iðnó

Katrín Jakobsdóttir fagnaði því að ríkisstjórnin hélt stuðningi og leið bara nokkuð vel með niðurstöður þó að Vinstri Græn misstu þrjá þingmenn frá síðustu kosningum.

Vinstri grænir kunna svo sannarlega að skemmta sér saman. Hópurinn fagnaði mikið yfir öllum sigrum, stórum sem smáum. Þakið ætlaði af Iðnó á einum tímapunkti og stukku þá allir sem voru frammi í andyri inn í sal til að taka þátt í gleðinni. 

Myndaveggur, blöðrudýr og kaldar veigar virtust hitta í mark hjá stuðningsfólki, sem fagnaði saman sem ein fjölskylda. Unnur Eggertsdóttir kosningastjóri var einstaklega ánægð með hópinn sinn þegar blaðamaður hitti á hana í miðri kaosinni. 

Svandís Svavarsdóttir sat fremst við sviðið ásamt sínu fólki og hópurinn fagnaði líka ákaft þegar Katrín Jakobsdóttir mætti í hús. 

Samfylkingin: Rafmagnað andrúmsloft

Samfylkingin var með sína kosningavöku í Gamla bíó. Það var þétt setið bæði í salnum og uppi á svölum en stemningin var þó frekar róleg þegar blaðamaður mætti á svæðið.

Flokkurinn ætlaði sér stóra hluti í kosningunum og var ekki laust við að vonbrigða gætti með niðurstöðurnar.

Andrúmsloftið var vægast sagt rafmagnað og margir völdu að sitja bara á borðinu með sínum hóp. 

Það var ánægjulegt að sjá hvað stuðningsmenn og frambjóðendur tóku rauða þemað alla leið. Rauðir bolir, rauðar neglur, rauð bindi, rauðir jakkar, rauðir kjólar og rauðir varalitir sáust um allt Gamla bíó. 

Rósa Björk Brynjólfsdóttir og Kristján Guy Burgess kosningastjóri flokksins voru ótrúlega hress þegar blaðamaður og ljósmyndari litu við hjá Samfylkingunni.

Sósíalistaflokkurinn: Úrslitin mikil vonbrigði

Stemmningin var ekkert til að hrópa húrra yfir hjá Sósíalistaflokknum á KEX í lok kvölds. Ástæðan augljós. 

Flokkurinn náði engum manni inn á þing þrátt fyrir að hafa mælst með yfir fimm prósent fylgi í flestum könnunum.

Hópurinn skemmti sér þó vel en innan við hundrað stuðningsmenn mættu og spiluðu þau meðal annars pílu saman.

Barþjónninn gaf sér á tal við blaðamann og talaði sérstaklega um það hvað hópurinn hafi skemmt sér fallega og engin vandamál komið upp.

María Lilja Þrastardóttir Kemp var áberandi glæsileg í rauðu og kom pelsinn sér vel þegar hún stóð úti í kuldanum og spjallaði við stuðningsmenn og aðra frambjóðendur.

Framsókn: Herra Hnetusmjör tónleikar og We are the Champions 

„Til hamingju með kvöldið,“ sagði Lilja Alfreðsdóttir við stuðningsmenn Framsóknarflokksins þegar hún ávarpaði partýið skömmu eftir miðnætti. 

„Við ætlum okkur stóra hluti.“

Troðfullt var út úr húsi á kosningarvöku Framsóknarflokksins úti á Granda. Færri komust að en vildu og var hópur fólks fyrir utan sem beið í von um að einhverjir færu heim og pláss gæti myndast.

Ásmundur Einar Daðason tók töluverða áhættu í þessum kosningum og flutti sig úr öruggu kjördæmi í norðvestri í baráttuna í Reykjavík. 

Það borgaði sig og fagnaði hann innilega ásamt Brynju Dan frambjóðanda í partýi flokksins.

Allt ætlaði að verða vitlaust þegar rapparinn Herra Hnetusmjör steig á svið og tók nokkur lög. Gólfið nötraði og fólk dansaði eins og enginn væri morgundagurinn.

Bjórinn flæddi um partýið og var gólfið orðið vel klístrað eins og á skemmtistað. 

Undirrituð fékk tvisvar bjórslettur yfir sig í troðningnum hjá Framsókn og stemningin minnti á margan hátt á gott menntaskólaball.

Lilja Alfreðsdóttir stóð fremst við sviðið og tók myndbönd af rapparanum og stuðningsfólkinu og brosti út að eyrum. Stuðningsmenn voru í faðmlögum og sungu saman lög eins og We Are The Champions og öskruðu svo „Reykjavík er okkar, já hún er okkar...“

Stemningin hjá Framsókn var áberandi best. Hópurinn fagnaði með miklum látum í hvert einasta skipti sem nýjar tölur bárust og var ljóst að stuðningsmenn Framsóknar voru í skýjunum með niðurstöður kosninganna enda án efa sigurvegarar þessara kosninga, með þrettán þingmenn.

Frjálslyndi lýðræðisflokkurinn: Kannski næst bara

Kosningavaka Frjálslynd lýðræðisflokksins minnti einna helst á litla krúttlega fermingarveislu.

Stuðningsmenn Guðmundar Franklín og Glúms Baldvinssonar héldu til í sameiginlega rýminu á fyrstu hæð í Árskógum 6-8 í Breiðholti.

„Við reyndum allavega, það verður ekki tekið frá okkur,“ sagði Guðmundur við stuðningsfólk sitt í gær og þakkaði þeim sem höfðu trú á flokknum. 

Hann hefur þó nú tilkynnt að hann sé kominn með nóg og verði ekki næst á lista.

Rúmlega tíu gestir voru á kosningavökunni þegar við litum þar við, en eflaust fjölgaði eitthvað í hópnum þegar á leið á kosningakvöldið.

Magnús Guðbergsson oddviti Frjálslynda lýðræðisflokksins í Suðurkjördæmi, sagði við blaðamann að ef flokkurinn færi ekki á þing núna, myndi hann ná því næst. 

Flokkurinn náði 0,4 prósenta fylgi á landsvísu og var því fjarri því að ná þingmanni.

Miðflokkurinn: Blöðrubogar og búningar á Natura

Miðflokkurinn var saman á Hótel Natura í gær. Stemningin þegar ég gekk þar inn var sérstök, mér leið smá eins og þetta væri óvænt afmælisveisla og það væri verið að bíða eftir afmælisgestinum. 

Sigmundur Davíð var ekki á staðnum þegar ég leit þar inn, kannski var verið að bíða eftir honum.

Myndabás með skrautlegum höttum og blöðrubogi að hætti Æði strákanna tóku á móti gestum í andyrinu. Inni í salnum fylgdust allir einbeittir með tölunum. 

Konur voru heilt yfir í mestu gleðivímunni þvert á flokka, enda konur nú í fyrsta sinn í sögunni í meirihluta á Alþingi. Ég þakka öllum flokkum gestrisnina og höfðingjalegar móttökur.

Hér má nálgast allt það helsta úr umfjöllun fréttastofunnar um Alþingiskosningarnar 2021.