Tvö met voru slegin í desember. Kortavelta innanlands, leiðrétt fyrir verðlagsbreytingum, hefur aldrei verið jafn mikil og heildarkortavelta landsmanna, leiðrétt fyrir gengis- og verðbreytingum, náði hæsta gildi sínu frá upphafi mælinga.
Ef horft er yfir fjórða ársfjórðung 2021 í heild sinni jókst kortavelta landsmanna, á föstu gengi og verðlagi, um 17,8 prósent milli ára og þarf að leita aftur til ársins 2006 til að finna álíka vöxt.
Erna Björg bendir á að Seðlabankinn geri ráð fyrir 5 prósenta ársvexti í einkaneyslu á fjórða ársfjórðungi 2021.
„Þótt Hagstofan hafi lag á því að koma greinendum í opna skjöldu með þjóðhagsreikningum sínum, og það væri alls ekki nýtt að sjá slaka einkaneyslu þvert á þróun kortaveltu, þá tel ég líklegt að einkaneyslan á fjórðungnum muni fara langt fram úr væntingum Seðlabankans, og styðja þar með við frekari vaxtahækkanir,“ segir Erna Björg.
Ólíklegt er, að sögn Ernu Bjargar, að janúarmánuður verði metamánuður sökum hertra sóttvarnaraðgerða en á móti vegur að staða faraldursins virðist hafa minni áhrif á neysluvilja heimilanna en t.d. árið 2020.
„Maður veltir einnig fyrir sér hvort þetta muni hafa áhrif á peningastefnunefndina, hvort hún kjósi að taka smærri skref í einu í vaxtahækkunarferlinu þrátt fyrir verðbólgu yfir 5 prósentum.“
Töluvert meiri eyðsla á hvern ferðamann
Tölurnar varpa einnig ljósi á jákvæða þróun í kortaveltu erlendra ferðamanna.
„Það þýðir lítið að skoða breytingar milli ára í heildarkortaveltu ferðamanna eða kortaveltu á hvern ferðamann. Þegar örfáar hræður eru á landinu þýðir lítið að gera samanburð milli ára,“ útskýrir Erna Björg. Miklu gagnlegra sé að skoða seinni hluta síðasta árs, þegar ferðaþjónustan komst á skrið, og bera saman við árið 2019.
„Þá má sjá að hver erlendur ferðamaður er að eyða nokkuð meira en á sama tíma árið 2019, eða í kringum 20-30 prósent. Það gæti að einhverju leyti endurspeglað lengri dvalartíma en vonandi einnig að hinu áragamla markmiði um að laða til landsins betur borgandi ferðamenn sé náð, að minnsta kosti í augnablikinu.“
