Þá telja markaðsaðilar – bankar, lífeyrissjóðir og verðbréfa- og fjárfestingasjóðir – að meginvextir Seðlabankans hækki í 2,5 prósent á yfirstandandi ársfjórðungi og um 0,25 prósentur til viðbótar í hverjum fjórðungi sem eftir er árs og verði 3,5 prósent í árslok 2022. Í kjölfarið vænta þeir þess að vextirnir haldist óbreyttir ári síðar.
Þetta eru talsvert hærri vextir en markaðsaðilar bjuggust við í fyrri könnun bankans í nóvember en þá væntu þeir þess að meginvextirnir yrðu 2,5 prósent eftir eitt ár og 3 prósent að tveimur árum liðnum.
Könnun Seðlabankans náði til 29 markaðsaðila og var svarhlutfallið 86 prósent.
Vísitala neysluverðs hækkaði um 0,5 prósent í janúar á þessu ári, þvert á allar spár greinenda, og mælist tólf mánaða verðbólga því 5,7 prósent. Hefur árstaktur verðbólgunnar ekki verið meiri frá því í apríl árið 2012. Ávöxtunarkrafa ríkisskuldabréfa hefur rokið upp að undanförnu, einkum á styttri endanum, og nemur hækkunin frá áramótum á bilinu um 40 til 70 punktum.
Niðurstöður könnunarinnar gefa til kynna að markaðsaðilar telji að verðbólgan muni haldast að meðaltali í 5 prósent á fyrsta fjórðungi ársins en hjaðni á næstu mánuðum og verði 4,7 prósent á öðrum ársfjórðungi 2022.
Verðbólguvæntingar til tveggja og fimm ára hafa hækkað frá síðustu könnun og mælast 3 prósent. Verðbólguvæntingar til tíu ára hafa einnig hækkað og gera ráð fyrir 2,75 prósent verðbólgu. Þá gefur könnunin til kynna að markaðsaðilar vænti þess að gengi krónunnar hækki á næstu misserum og að gengi evru gagnvart krónu verði 140 krónur eftir eitt ár.
Markaðsaðilar búast við því að launahækkanir í komandi kjarasamningalotu í lok ársins verði minni en í yfirstandandi lotu. Miðað við miðgildi svara gera þeir ráð fyrir að launavísitalan hækki að meðaltali um 5 prósent á ári í næstu samningalotu.
