Tók eftir undar­legri hegðun í að­draganda bón­orðsins

Ebba Katrín Finnsdóttir og Oddur Júlíusson eru bæði útskrifuð úr leiklistardeild Listaháskóla Íslands. Oddur útskrifaðist árið 2013 og hefur síðan þá verið fastráðinn í Þjóðleikhúsinu samhliða því að hafa leikið í hinum ýmsu þáttum og kvikmyndum.

Ebba Katrín útskrifaðist árið 2018 og starfaði í kjölfarið eitt leikár í Borgarleikhúsinu áður en hún færði sig yfir í Þjóðleikhúsið þar sem hún hefur verið síðan. Ebba sló nýlega í gegn í hlutverki sjálfrar Júlíu í sýningunni Rómeó og Júlíu.

Þau Ebba Katrín og Oddur voru gestir í 42. þætti af hlaðvarpinu Betri helmingurinn með Ása sem hóf göngu sína síðasta vor. Umsjónarmaður þáttanna er Ásgrímur Geir Logason. Hann fær til sín þjóðþekkta einstaklinga ásamt þeirra betri helming og ræðir um ástarsambandið, lífið og tilveruna.

„Ég var búinn að stilla mig inn á það að vera þolinmóður“

„Við þekktumst svona lítillega áður en við fórum að stinga saman nefjum. Við áttum sameiginlega vini. Ég var að vinna niðri í Þjóðleikhúsi og Ebba var líka að vinna niðri í Þjóðleikhúsi þá sem dresser og við vorum búin að vita af hvoru öðru í svolítinn tíma. Svo allt í einu kviknar svona áhugi hjá mér fyrst og vinir okkar fara svona að fatta þetta og fara svona að peppa mig og líka hana. Þannig það var svona aðeins verið að ýta okkur saman,“ segir Oddur.

Þau voru að vinna í sömu sýningu og Oddur var farinn að gera sér upp tilefni til þess að kíkja á Ebbu og spjalla. Vinir hans höfðu hins vegar sagt honum það að Ebba væri flókin týpa og erfitt væri að nálgast hana.

„Hún var í fyrsta lagi á lokaári í Listaháskólanum, en allt námið er maður í rauninni með hausinn uppi í rassgatinu á sjálfum sér. Maður er ekkert að hugsa um neitt annað, maður er bara að hugsa um námið. Maður hittir varla fjölskylduna sína, hvað þá að vera nenna standa í einhverju svona dúlli. Þannig ég var búinn að stilla mig inn á það að vera þolinmóður.“

Bauð henni út á snjósleða

Einn daginn ákvað hann þó að taka af skarið og bjóða henni á stefnumót. Hann vildi vera ævintýragjarn og hans fyrsta hugmynd var að bjóða henni út í fótbolta. Veðrið var þó ekki að vinna með honum, enda var þetta um hávetur. Hann brá því á það ráð að bjóða henni út á Stiga-sleða í Plútó brekkunni á Nesinu.

„Það var óveður og ég sá ekki framan í hann. Við fórum svona tvær og hálfa ferð og ákváðum svo að þetta væri bara komið gott,“ segir Ebba um fyrsta stefnumótið.

Fann tíma fyrir hann þrátt fyrir fullbókaða dagskrá

Eftir stefnumótið heyrði Oddur hins vegar lítið frá Ebbu, enda mikið að gera bæði í skóla og vinnu.

„Hefði ég ekki gengið sjálfur í gegnum þennan skóla þá hefði mig ekki grunað að Ebba hefði snefil af áhuga á mér, af því merkin voru fá. En svo fór ég að reyna finna merkin og það bjargaði mér."

Hann segir frá því að einn fimmtudaginn hafi hann spurt hana hvort hún vildi hitta sig. Þá hafi hann fengið það svar að hún gæti hitt hann næsta þriðjudag á milli klukkan 16 og 17.

„Síðan hitti ég hana og ég man eftir því að hafa séð dagatalið hjá henni og þá var þetta bara virkilega eini klukkutíminn sem hún átti alla vikuna og ég hugsaði: Æ hún gaf mér hann!,“ segir Oddur.

Góðs viti að hún hefði sagt mömmu sinni frá honum

Annað merkið kom svo þegar Oddur mætti á söngkynningu Listaháskólans og móðir Ebbu kom og kynnti sig fyrir honum.

„Ég hugsaði að fyrst hún væri búin að segja mömmu sinni frá mér, þá hlyti þetta að skipta einhverju máli. Ég þurfti svona að lesa í öll þessi merki. Þetta var þrautaganga og ég skil eiginlega ekki alveg hvað mér gekk til,“ segir Oddur.

„Það var eitthvað sem dró mig áfram á meðan rökhyggjan mín sagði mér að þetta væri ekkert að fara neitt. Þetta gerðist svo hægt en svo fann ég þetta alveg ágerast og við fórum að eyða meiri tíma saman.“

Óvart sambandsafmæli á Valentínusardaginn

Í þættinum segja þau einnig frá augnablikinu sem þau ákváðu að þau væru nú formlega kærustupar. Ebba hafði verið í mat hjá foreldrum sínum þegar bróðir hennar gekk á hana og spurði hana hvort hún og Oddur væru par. Hann skildi svo ekkert í því þegar Ebba svaraði honum að þau væru einfaldlega ekki búin að ræða það.

Ebba fór svo til Odds um kvöldið og sagði: „Hérna Árni bróðir var eitthvað að spá hvort að við værum kærustupar.“

Oddur svaraði því á þann hátt að hann væri til ef hún væri til. Nokkrum dögum síðar áttuðu þau sig á því að þetta samtal hafði átt sér stað á sjálfan Valentínusardaginn og því markar sá rómantíski dagur sambandsafmæli þeirra, þó það hafi verið óviljandi.

Undarleg hegðun í aðdraganda bónorðsins

Þau höfðu verið saman í nokkur ár þegar heimsfaraldur skall á sem hafði gríðarleg áhrif á vinnu þeirra beggja. Heilt ár leið þar sem þau eyddu nánast öllum stundum ofan í hvoru öðru. Það varð til þess að Oddur hugsaði með sér að fyrst þau hefðu komist í gegnum það ár, þá kæmust þau saman í gegnum hvað sem er.

Hann tók því ákvörðun um að biðja hennar í Flatey, þar sem foreldrar hans eiga sumarhús.

Sjá: Ebba Katrín og Oddur trú­lofuðu sig í Flatey

 Þegar þau lögðu af stað í ferðalagið tók Ebba eftir því að Oddur var farinn að hegða sér óvenjulega. Það vakti sérstaka athygli hennar þegar Katrín Halldóra, leikkona og vinkona Odds hringdi í hann þegar þau voru nýlögð af stað.

„Hann svarar og segir „Hæ Kata, Ebba er hérna með mér!“,“ en þá var Katrín ein af þeim fáu sem vissu af áformum Odds og hann vildi því fyrirbyggja að hún myndi óvart tala af sér.

„Ertu með einhverja klámspólu þarna ofan í?“

Eitt kvöldið í Flatey ætlaði Ebba svo að sækja hátalara sem var í töskunni hans Odds. Hann tók þá skyndilega á sprett til þess að vera á undan henni og varð svo undarlegur á svipinn þegar hann loks opnaði töskuna.

„Ég spyr: Hvað var þetta? Ertu með einhverja klámspólu þarna ofan í eða?“

Það var svo einn blíðviðrisdaginn í Flatey sem þau Ebba og Oddur nutu sín saman úti á palli og Ebba stakk upp á því að þau myndu opna kampavínsflösku. Oddur ákvað að nú væri rétta augnablikið.

„Þarna var ég búinn að sækja boxið og var með það í vasanum. Ég var í þannig buxum að boxið sást alveg í vasanum. Ég þurfti að setjast niður mjög skringilega og setja höndina yfir vasann. Svo loksins náðum við í flöskuna og hellum í glös.“

Oddur ákvað því næst að taka upp símann til þess að taka mynd af Ebbu og fór niður á hné til þess að ná ákveðnu sjónarhorni. Hann kveikti á myndbandsupptöku og bar loks upp stóru spurninguna.

„Það var svo eitthvað ósjálfrátt viðbragð hjá mér að ég slökkti á kamerunni um leið og ég var búin að spyrja hana. Þannig við eigum video af því þegar hún sér boxið og segir „Oddur!“ en svo ekkert meir.“

Eftirminnilegt brúðkaup á Suðureyri

Í þættinum segja þau frá eftirminnilegri helgi á Vestfjörðum. Þeim hafði verið boðið í brúðkaup á Suðureyri en gleymdu að hugsa fyrir gistingu. Það fór svo að Oddur leigði pínulítið ferðahýsi sem hann gat tengt aftan í bílinn.

Ebba var hins vegar föst í bænum, svo Oddur lagði af stað á föstudeginum og stóð til að Ebba kæmi á laugardeginum. Þau sáu fyrir sér að eyða rómantískri helgi tvö saman í litla notalega ferðahýsinu.

„Það var svona gler í loftinu og maður gat horft á stjörnurnar. Svo var bara ótrúlega þægileg dýna og allt svo fullkomið. Ég var svo spenntur að fá Ebbu.“

Týndi lyklinum

Á laugardeginum þegar veisluhöld stóðu í hæstu hæðum, uppgötvaði Oddur að hann hefði týnt lyklinum að ferðahýsinu. Það fór svo að á meðan aðrir gestir skemmtu sér konunglega inni á bar á Suðureyri, stóð Oddur einn úti í rigningunni að leita að lyklinum.

„Ég var svo svekktur. Ég var svo reiður úti í sjálfan mig. Ég gat ekki kennt neinum öðrum um þetta heldur en sjálfum mér,“ segir Oddur sem gafst á endanum upp á leitinni. Það fór svo að þau gistu hjá vinum sínum á Flateyri.

Daginn eftir, rétt áður en brúðkaupsathöfnin sjálf fór fram, hvatti Ebba Odd til þess að fara út að leita einu sinni enn. Hann hafði þó litla trú á því að sú leit myndi bera árangur. Allt kom þó fyrir ekki og lykillinn kom í leitirnar.

Hér að neðan má hlusta á viðtalið við þau Ebbu og Odd í heild sinni. Í þættinum fara þau um víðan völl og ræða meðal annars um leiklistina, matarboð, útilegur og fatapokana hennar Ebbu.