Seðlabankinn hækkaði stýrivexti um 0,25 prósentur í morgun í 5,75 prósent. Bankinn hefur að undanförnu hækkað vexti hratt til að ná böndum á vaxandi verðbólgu. Frá því í byrjun maí hafa stýrivextir hækkað um þrjú prósentustig. Verðbólga mældist þá 7,6 prósent og jókst í 9,9 prósent júlí en lækkaði í 9,3 prósent í september.
Við erum að sjá gríðarlega mikinn árangur af því sem við höfum gert.
„Við erum að sjá gríðarlega mikinn árangur af því sem við höfum gert,“ sagði Ásgeir á fundinum. Ákveðið var að hækka vexti mjög skarpt til að bregðast við vaxandi verðbólgu. „Við tökum hart á þessu. Alltaf þegar verið er að eiga við verðbólgu er betra að hækka fyrr en seinna. Verðbólga er byrjuð að lækka og horfur eru á að hún geri það áfram,“ sagði hann.
Til að bregðast við efnahagsþrengingum sem rekja má til Covid-19 heimsfaraldursins voru stýrivextir lækkaðir í 0,75 prósent í ársbyrjun 2021 en þeir hafa nú á nokkuð skömmum tíma hækkað í 5,75 prósent, eins og fyrr segir.
Ásgeir sagði að Seðlabankinn sé reiðubúinn að hækka stýrivexti frekar ef þurfa þyki. „Það veltur á því hvernig verðbólga mun þróast og hvernig næstu kjarasamningar verða,“ sagði hann. Að eiga við verðbólgu sé samvinnuverkefni atvinnulífs, vinnumarkaðar og ríkisfjármála.
„Við erum að gefa boltann upp. Seðlabankinn er að ná árangri. Við höfum hækkað vexti og áhrifin eru komin fram. Ætla vinnumarkaðurinn, ríkisstjórnin og atvinnulífið að taka við boltanum af okkur? Ef það gengur eftir þurfum við mögulega ekki að beita vaxtatækinu mikið meira. Það er skýrt ef þetta gengur í aðra átt verðum við að gera það. Það er enginn efi í okkar huga að við verðum að ná þeim markmiðum sem okkur eru sett samkvæmt lögum,“ sagði Ásgeir og á þar við að markmið Seðlabankans er að verðbólga sé 2,5 prósent.
Ásgeir sagði að allt benti til þess að stýrivaxtahækkanirnar leiði til þess að verðbólga muni hjaðna og það búi undir mjúka lendingu í hagkerfinu.
Hann vakti athygli á því að rétt eins og verðbólga hafi komið hratt fram vegna hækkandi húsnæðisverðs geti sá þáttur verðbólgunnar farið hratt út aftur. „Það er að fara gerast.“
