Keppa um heimsmeistaratitil í beinni útsendingu úr Elliðaárdal

Tinni Sveinsson skrifar 10. október 2022 17:01

Mari Jaersk og aðrir íslenskir keppendur hittust til að taka æfingahlaup í brautinni í Elliðaárdal á dögunum. Gummi St.

Næstu helgi keppa fimmtán ofurhlauparar fyrir Íslands hönd í bakgarðshlaupi í Elliðaárdal. Ræst verður á sama tíma í þrjátíu og sjö löndum og hlaupið hring eftir hring þar til aðeins einn hlaupari stendur eftir. Hlaupið verður í beinni útsendingu hér á Vísi.

Hlaupið út um allan heim

Bakgarðhlaupin hafa vakið mikla athygli hér á landi en nokkur mót hafa verið haldin síðustu misseri. Með þeim vann Ísland sér inn þátttökurétt á heimsmeistaramóti landsliða í greininni sem fram fer um næstu helgi. Hlaupið verður samtímis í 37 löndum víða um heim.

Vísir verður með beina útsendingu á meðan á keppni stendur. Útsendingin hefst klukkan ellefu á laugardag, klukkutíma áður en hlaupararnir eru ræstir af stað, og stendur allt þar til síðasti Íslendingurinn hefur lokið keppni. Búast má við því að það verði á mánudagsmorgun. Hægt verður að horfa á útsendinguna hér á Vísi og á sjónvarpsstöðinni okkar, Stöð 2 Vísi.

Alls taka 555 af bestu ofurhlaupurum heimsins þátt, 15 í hverju landsliði. Hvert lið hleypur í sínu eigin landi og hefja öll lið keppni á nákvæmlega sama tíma. Þannig að á meðan íslensku keppendurnir hlaupa af stað á hádegi á laugardag fara þeir nýsjálensku af stað þegar klukkan er eitt eftir miðnætti í Nýja-Sjálandi, á sama tíma.

Mikill spenningur fyrir Íslandi

Fimmtán bestu íslensku hlaupararnir tryggðu sér sæti í landsliðinu út frá árangri í bakgarðshlaupunum sem haldin hafa verið hérlendis.

Elísabet Margeirsdóttir er liðsstjóri Íslendinga á mótinu.Vísir/Sigurjón

„Við getum ekki beðið eftir helginni og vonum að sem flestir hvetji okkar fólk í íslenska liðinu áfram. Liðið er gríðarlega sterkt og undirbúningur hefur gengið vel,“ segir Elísabet Margeirsdóttir, liðsstjóri íslenska liðsins.

Hún hefur haft veg og vanda af skipulagningu mótsins og er í stöðugu sambandi við skipuleggjendur ytra.

„Þau eru ótrúlega spennt fyrir því að fá Ísland í keppnina og við erum í sérstöku uppáhaldi hjá þeim. Til að mynda eru þau eru með stóra útsendingu á YouTube á meðan keppninni stendur þar sem hvert land fyrir sig verður í fókus. Þar var lögð sérstök áhersla á að hafa íslensku umfjöllunina eina af þeim fyrstu þegar keppni hefst.“

Falleg braut í Elliðaárdal

Keppnisstaðurinn á Íslandi verður í Elliðaárdal og fer hlaupabrautin um góða stíga dalsins. Eins og sést á myndbandinu í spilaranum hér að neðan er brautin falleg.

Svona virkar keppnin

Hlaupinn verður 6,7 kílómetra hringur á hverjum klukkutíma í hverju landi. Allir hringir verða ræstir á heila tímanum og er mikilvægt að koma sér á ráslínu tímanlega áður en sá næsti hefst.

Markmið liðsins er að ná sem flestum samanlögðum fjölda hringja á meðan keppnin er enn í gangi. Númer hvers keppanda fer eftir árangri og munu þau einnig keppast um að sigra sinn númeraflokk.

Þegar aðeins einn keppandi í íslenska liðinu er eftir og hefur lokið einum hring einn (sigurvegarinn) þá lýkur keppninni á Íslandi. Sigurvegari íslensku keppninnar vinnur sér inn þátttökurétt á Heimsmeistaramóti einstaklinga í bakgarðshlaupum 2023.

Íslensku keppendurnir í bakgarðshlaupinu.

Mari fremst Íslendinga

Mari Jaersk setti Íslandsmetið í vor þegar hún hljóp í 43 klukkustundir, alls 288 kílómetra. Því má búast við því að íslensku keppendurnir hlaupi allt fram á mánudagsmorgun.

Hér að neðan má sjá lista yfir íslensku keppendurna í þeirri röð sem þeir tryggðu sér þátttökurétt.