„Eitt­hvað heillandi við jóla­andann í bland við kuldann og stressið“

Jólamolar Vísis munu birtast reglulega fram að jólum. Þar fáum við að kynnast þjóðþekktum einstaklingum í nýju ljósi og komast að því hvað það er sem kemur þeim í jólagírinn. Jólamolunum er ekki síður ætlað að koma lesendum Vísis í hið eina sanna hátíðarskap.

Hvort myndirðu skilgreina þig sem Elf eða The Grinch?

„Klárlega Elf. Jólin hafa verið uppáhaldstími ársins hjá mér undanfarin ár. Jólin gefa manni færi á að slaka á, borða aðeins óhollari mat og verja tíma með vinum og fjölskyldu. Svo er líka eitthvað heillandi við jólaandann í bland við kalda veðrið og jólastressið. Vonandi fáum við snjó!“

Hver er þín uppáhalds jólaminning?

„Það eru margar minningar með ömmu, afa og frænda sem koma upp en því miður eru þau öll farin frá okkur.

Það var ekkert eðlilega gaman að borða pizzu og nammi og spila tölvuleikinn FIFA við bræður mína á aðfangadag upp á hver myndi þurfa að lesa á pakkana. Ég vann að sjálfsögðu alltaf.“

Hver er eftirminnilegasta jólagjöf sem þú hefur fengið?

„Ansi oft hef ég vitað hvað ég er að fá í jólagjöf þar sem ég hef beðið bræður mína að gefa mér eitthvað ákveðið og svo gefa mamma og pabbi mér yfirleitt pening til að kaupa eitthvað sem verður síðan að sjálfsögðu að pakka inn og að setja undir jólatréð. Það er því ekki margt sem hefur komið mér á óvart eða staðið eitthvað sérstaklega upp úr. Til að segja eitthvað, ætli það hafi ekki verið að fá gjafabréf frá Sindra Tattoo frá bræðrum mínum fyrir nokkrum árum (kom svakalega á óvart).“

Hver er versta jólagjöf sem þú hefur fengið?

„Ætli það sé bara ekki einhvern tímann þegar Lalli bró gaf mér flík sem ég hefði frekar brennt heldur en að klæða mig í.“

Hver er uppáhalds jólahefðin þín?

„Að fara á Jón Jónsson jólatónleika. Ég er svakalega spenntur fyrir tónleikunum hans og Frikka 17 desember. Áfram FH!

Að fara á leiðið hjá ömmu og afa með fjölskyldunni og minnast þeirra sem eru farnir frá okkur á aðfangadag er líka afar þýðingarfullt.“

Hvað er uppáhalds jólalagið þitt?

„Eitt sinn rétt fyrir jólin með Svölu Björgvins.“

Hver er þín uppáhalds jólamynd?

„Kannski ekki beint jólamyndir en ég elska að horfa á Harry Potter og Lord of the Rings á jólunum.“

Hvað borðar þú á aðfangadag?

„Kalkún.“

Hvers óskar þú þér í jólagjöf í ár?

„Bækur, upplifun eða nudd.“

Hvað er það sem hringir inn jólin fyrir þér?

„Ætli það sé ekki þegar ég er að keyra á Íslandi í snjókomu einhvern tímann í desember og það kemur óvænt jólalag í útvarpið.

Þegar klukkan slær 18:00 á aðfangadag og ég knúsa og kyssi mitt fólk gleðileg jól.“

Er eitthvað skemmtilegt á döfinni hjá þér núna fyrir jólin?

„Ég kem heim frá Kaliforníu rétt fyrir jólin. Þangað til mun skólinn gleypa mest allan tímann minn ásamt því að halda áfram að hvetja fólk til að fjárfesta í nýju bókinni og spilinu.

Ég vona að sem flestir fái bókina Tíu skilaboð – að skapa öryggi úr óvissu og 24/7 – spurningaspil sem stuðlar að innihaldsríkum samræðum í jólapakkann sinn – fæst á beggiolafs.com.“