Besta-spáin 2023: Sálin hans Jóns í Úlfarsárdalnum

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með heilli umferð á annan í páskum, mánudaginn 10. apríl. Breiðablik á titil að verja en liðið varð Íslandsmeistari í annað sinn í fyrra.

Íþróttadeild spáir Fram 9. sæti Bestu deildarinnar í sumar og að liðið lendi í sama sæti og á síðasta tímabili.

Fram sneri aftur í efstu deild á síðasta tímabili eftir áratugs fjarveru og það með stæl. Með djarfan leikstíl að vopni skoruðu Frammarar helling en fengu líka á sig gommu af mörkum. Þeir voru þó duglegir að safna stigum og voru aldrei í teljandi fallbaráttu. Og Fram eignaðist nýjan heimavöll í Úlfarsárdalnum þar sem liðið tapaði bara þremur af ellefu leikjum sínum.

Jón Þórir Sveinsson er að hefja sitt fimmta tímabil við stjórnvölinn hjá Fram en hann hefur gert frábæra hluti með liðið sem hann átti svo góðu gengi að fagna með sem leikmaður á 9. áratug síðustu aldar. Hann er kominn með nýjan aðstoðarmann, fyrrverandi atvinnu- og landsliðsmanninn Ragnar Sigurðsson sem þreytir frumraun sína í þjálfun í sumar.

Verkefni Jóns er að byggja ofan á árangur síðustu ára og forða því að Fram falli í sömu gryfju og svo mörg lið hafa fallið í á öðru tímabili í efstu deild. Það gæti þó reynst snúið því leikmannahópurinn virðist ekki sterkari en í fyrra og erfitt að treysta á að Guðmundur Magnússon eigi annað eins og tímabil og í fyrra þar sem hann skoraði sautján mörk í Bestu deildinni.

Svona var síðasta sumar í tölum

Liðið og lykilmenn

Brynjar Gauti Guðjónsson (f. 1992): Gekk í raðir félagsins á síðustu leiktíð til að þétta varnarleik liðsins en liðið lak töluvert af mörkum síðasta sumar. Þó liðið hafi haldið áfram að fá á sig fjölda marka má samt færa rök fyrir því að Brynjar Gauti hafi stórbætt varnarleik Fram. Betur má ef duga skal og þarf miðvörðurinn að vera upp á sitt besta í sumar.

Tiago Fernandes (f. 1995): Segja má að Portúgalinn hafi komið verulega á óvart á sínu fyrsta tímabili í efstu deild. Ásamt því að skora fimm mörk þá gaf hann þrettán stoðsendingar og endaði næststoðsendingahæstur í allri Bestu deildinni. Ljóst er að Fram þarf á sama framlagi að halda í sumar ætli liðið sér að forðast falldrauginn.

Guðmundur Magnússon (f. 1991): Tiago var ekki eini leikmaður Fram sem kom á óvart á síðustu leiktíð. Eins og þruma úr heiðskíru lofti þá mætti Guðmundur í sínu besta formi og gat hreinlega ekki hætt að skora. Endaði hann á að þenja netmöskvana sautján sinnum síðasta sumar. Nú er bara að endurtaka leikinn.

Markaðurinn

Miðað við síðasta tímabil var algjört lykilatriði fyrir Framara að ná að halda Guðmundi Magnússyni sem framlengdi samning sinn við félagið. Þeir hafa hins vegar haft frekar hægt um sig á félagsskiptamarkaðnum og gætu þurft að nýta næstu vikur vel til að bæta í hópinn.

Hægri bakvörðurinn Adam Örn Arnarson skipti við Alex Frey Elísson sem fór til Breiðabliks eftir að hafa farið á kostum fyrir Framara í fyrra. Adam er 27 ára og sneri heim úr atvinnumennsku í fyrra en náði ekki að vinna sig inn í lið Breiðabliks og var lánaður til Leiknis, og hefur enn mikið að sanna í Bestu deildinni.

Fram sótti einnig tvo leikmenn úr Lengjudeildinni með því að fá „hinn“ Aron Jóhannsson, öflugan miðjumann sem leikið hefur með Grindavík síðustu ár og skoraði í átta leikjum af tuttugu í fyrra, og Orra Sigurjónsson frá Þór. Orri, sem er yngri bróðir Atla í KR, er 28 ára og getur leikið sem aftasti miðjumaður eða í vörn, og fær nú loks tækifæri á ný í efstu deild eftir að hafa leikið þar með Þór fyrir tæpum áratug.

Það er mikill skellur fyrir Fram að hafa misst Alex Frey og sömuleiðis sá liðið á eftir Indriða Áka Þorlákssyni sem var einnig fastamaður í liðinu í fyrra, auk þess sem miðjumaðurinn sterki Almarr Ormarsson lagði skóna á hilluna eftir góða og mikilvæga innkomu seinni hluta síðustu leiktíðar.

Að lokum ...

Fram leit ekkert alltof vel út á undirbúningstímabilinu en sú var líka raunin í fyrra. Út frá því er engin ástæða til að hafa stórkostlegar áhyggjur af strákunum hans Jóns. 

Ástæðurnar til að hafa áhyggjur af Fram snúa frekar að skorti á styrkingu í vetur, varnarleiknum, sem var hriplekur í fyrra, og hinni alræmdu gryfju sem mörg lið falla í á öðru tímabili sínu í deildinni.

Það er allavega erfitt að sjá Fram gera betur en á síðasta tímabili en liðið ætti að geta haldið sjó og þar með sæti sínu í Bestu deildinni. Liðið skorar alltaf mörk og ramminn sem Jón er búinn að smíða utan um það er nokkuð sterkur, nógu sterkur til vera réttu megin við strikið í haust.