Besta-spáin 2023: Ætla að taka stærsta og erfiðasta skrefið

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með heilli umferð á annan í páskum, mánudaginn 10. apríl. Breiðablik á titil að verja en liðið varð Íslandsmeistari í annað sinn í fyrra.

Íþróttadeild spáir KA 4. sæti Bestu deildarinnar í sumar og Akureyringar endi tveimur sætum neðar en á síðasta tímabili.

KA átti frábært tímabil í fyrra. Með Nökkva Þey Þórisson í broddi fylkingar spiluðu KA-menn góðan og árangursríkan fótbolta sem skilaði þeim 2. sæti. Það er næstbesti árangur í sögu KA og vegna hans spilar liðið í Evrópukeppni í sumar, í fyrsta sinn í tuttugu ár.

Arnar Grétarsson hætti hjá KA áður en síðasta tímabili lauk og Hallgrímur Jónasson, sem hafði verið aðstoðarþjálfari, tók við. Það þurfti ekki að koma neinum á óvart enda Hallgrímur í miklum metum fyrir norðan.

Þrátt fyrir að vera búnir að missa Nökkva bæta KA-menn brattir til leiks og hafa trú á því að þeir geti barist um titilinn, þótt fáir utan Akureyrar séu sammála því mati. En það væri skrítið að stefna á annað en Íslandsmeistaratitilinn tímabilið eftir að hafa lent í 2. sæti.

Til að hjálpa sér í þeirri baráttu hefur KA sótt liðsstyrk til Noregs og Færeyja auk þess sem Harley Willard færði sig um set innan bæjarins. Stærsta spurningarmerkið er hvort KA geti fyllt skarð Nökkva. Afar takmarkaðar líkur eru á að einn maður geri það en samtakamáttur nokkurra miðjumanna og framherja getur fleytt þeim gulu og bláu langt.

Svona var síðasta sumar í tölum

Liðið og lykilmenn

Dušan Brković (f. 1989): Kom inn í lið KA eins og stormsveipur sumarið 2021. Var fljótur að stimpla sig inn sem einn albesti miðvörður deildarinnar og er stór ástæða fyrir góðu gengi Akureyringa undanfarin tvö ár. Þá gerir hann alla í kringum sig betri.

Rodrigo Mateo Gomes (f. 1989): Þekkt stærð sem hefur spilað hér á landi síðan 2014. Gekk í raðir KA árið 2020 og hefur síðan verið einn besti djúpi miðjumaður deildarinnar. Stór, sterkur, aðstoðar varnarlínuna vel og er glettilega góður á boltanum.

Hallgrímur Mar Steingrímsson (f. 1990): Eftir að hafa verið potturinn, pannan og í raun eldhúsið sjálft í sóknarleik KA undanfarin ár þá steig Hallgrímur Mar aðeins til hliðar á síðustu leiktíð er Nökkvi Þeyr Þórisson blómstaði. Sá er farinn til Belgíu og því tekur Hallgrímur Mar aftur við kyndlinum. 

Markaðurinn

Besta viðbótin fyrir KA virðist hafa verið koma færeyska landsliðsmannsins Pæturs Petersen en þessi 25 ára miðjumaður skoraði tíu mörk fyrir HB Þórshöfn í Betri deildinni í Færeyjum í fyrra, og fjögur mörk í Lengjubikarnum fyrir KA í vetur.

KA sótti sér einnig tvo unga leikmenn frá Stafangri í Noregi. Annar er 19 ára kantmaðurinn Ingimar Torbjörnsson Stöle sem á að baki tvo leiki fyrir U19-landslið Íslands en hann hefur búið í Noregi alla sína tíð. Hinn er Norðmaðurinn Kristoffer Paulsen sem kom að láni frá Viking, þar sem hann var á varamannabekknum í fyrra, en hann er hávaxinn varnarmaður og jafnaldri Ingimars.

Vinstri bakvörðurinn Birgir Baldvinsson er mættur heim úr láni hjá Leikni og fyllir í skarðið fyrir Bryan Van Den Bogaert, og enski sóknarmaðurinn Harley Willard fær nú að láta ljós sitt skína í efstu deild eftir að hafa raðað inn mörkum í Lengjudeildinni fyrir Þór í fyrra og Víking Ólafsvík þar áður.

Að lokum ...

KA-menn vilja vera taldir upp með liðunum sem stefna á Íslandsmeistaratitilinn og trúin er til staðar fyrir norðan. En getur KA tekið næsta og stærsta skrefið?

Undirbúningstímabilið gaf allavega góð fyrirheit. KA tapaði fyrsta leik sínum í Lengjubikarnum en komst svo í úrslit hans þar sem liðið tapaði fyrir Val í vítaspyrnukeppni. Varnarleikurinn er áfram sterkur og sóknarleikurinn enn beittur þótt Nökkvi sé horfinn á braut. Í liði KA eru líka leikmenn sem geta spilað betur en í fyrra (Elfar Árni Aðalsteinsson og Ásgeir Sigurgeirsson) og leikmenn sem ættu að geta tekið annað skref fram á við (Daníel Hafsteinsson og Sveinn Margeir Hauksson). 

Í KA-liðinu eru nokkrir lykilmenn sem eru komnir yfir þrítugt og þótt það sé ekki beint á síðasta séns er færi fyrir þá að taka stærsta og erfiðasta skrefið í sumar.