Besta-spáin 2023: Lýsingin í partíinu dofnað

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með heilli umferð á annan í páskum, mánudaginn 10. apríl. Breiðablik á titil að verja en liðið varð Íslandsmeistari í annað sinn í fyrra.

Íþróttadeild spáir Víkingi 3. sæti Bestu deildarinnar í sumar og liðið endi þar með í sama sæti og á síðasta tímabili.

Víkingar mættu til leiks í fyrra sem Íslands- og bikarmeistarar. Þeir unnu bikarmeistaratitilinn þriðja sinn í röð en Íslandsmeistarabikarinn fór úr Traðarlandinu í Smárann. Slæm byrjun varð Víkingi að falli en liðið tapaði þremur af fyrstu sex deildarleikjum sínum. Eftir það var brekkan alltaf brött.

Í vetur reri fyrirliði Víkings, Júlíus Magnússon, á norsk mið og gekk í raðir Fredrikstad. Víkingar misstu þar sinn langmikilvægasta leikmann. Til að bæta gráu ofan á svart sleit Kyle McLagan krossband í hné í leiknum gegn Val í Lengjubikarnum og Víkingur stendur því eftir með aðeins tvo leikfæra miðverði og annar þeirra, Halldór Smári Sigurðsson missti talsvert úr vegna meiðsla í fyrra.

Víkingar þurfa því nauðsynlega á viðbótum aftarlega á vellinum að halda. Arnar Gunnlaugsson, sem er að hefja sitt fimmta tímabil við stjórnvölinn hjá Víkingi, hefur aðeins sótt tvo leikmenn í vetur og það er hætt við að liðsstyrkurinn þurfi að vera meiri til að reyna að fella Breiðablik af stalli sínum.

Svona var síðasta sumar í tölum

Liðið og lykilmenn

Ingvar Jónsson (f. 1989): Átti ekki sitt besta tímabil á síðustu leiktíð og fékk á sig alltof mörg mörk. Víkingar virðast hafa breytt leikstílnum örlítið í von um að fá á sig færri mörk og ætti Ingvar að njóta góðs af því. Segja má að Ingvar sé markvörður stóru augnablikanna og ætli Víkingar sér að endurtaka leikinn frá 2021 þarf Ingvar að eiga fleiri en eitt slíkt augnablik í sumar.

Pablo Punyed (f. 1990): Einn albesti leikmaður deildarinnar undanfarin ár. Gerir öll lið sem hann spilar fyrir betri og virðist geta leyst nær allar stöður á miðjunni, sama hvert leikkerfið er. Sannur sigurvegari sem nýtur sín í botn í Víkinni.

Danijel Dejan Djuric (f. 2003): Kom sprækur inn í lið Víkinga á síðustu leiktíð eftir að hafa verið í Danmörku árin þar á undan. Sýndi að það er fullt í hann spunnið og tekur nú þátt í sínu fyrsta heila tímabili í Bestu deildinni. Víkingar vona að hann geti fetað í fótspor Kristals Mána Ingasonar og sem stendur er ekkert því til fyrirstöðu.

Markaðurinn

Víkingar hafa ekki hagað sér eins og meistarakandídatar á markaðnum í vetur en hafa ber í huga að enn er opið fyrir félagaskipti, og það alveg til 26. apríl.

Það verður þó fróðlegt að sjá hvernig Matthías Vilhjálmsson kemur inn í Víkingsliðið, með alla sína reynslu og þekkingu í titlaöflun frá Noregi, eftir vonbrigðin sem hann upplifði í FH-búningnum.

Hinn leikmaðurinn sem Víkingar hafa sótt sér er tæplega helmingi yngri en Matthías, miðvörðurinn Sveinn Gísli Þorkelsson sem stóð sig vel með ÍR á sinni fyrstu leiktíð í meistaraflokki í fyrra, í 2. deild. Hann hefur spilað talsvert með Víkingi í Lengjubikarnum en þó aðeins einn leik í byrjunarliði.

Víkingar fá falleinkunn fyrir viðskipti vetrarins, í ljósi þess hvað þeir missa mikið í Júlíusi og McLagan, en geta bætt úr því og eru eflaust í leit að liðsstyrk í þessum skrifuðu orðum. Í vikunni kom raunar fram að svo virðist sem færeyski landsliðsmaðurinn Gunnar Vatnhamar sé á leið í Víkina en hann er 28 ára miðvörður sem einnig getur leikið sem miðjumaður.

Að lokum ...

Víkingur fékk á sig 41 mark í Bestu deildinni á síðasta tímabili og liðið þarf að herða skrúfurnar í varnarleiknum til halda sér við toppinn. Sóknarþungi Víkings var mikill í fyrra og ekkert lið skoraði fleiri mörk (66). Víkingar gáfu þó xG tölfræðinni langt nef en samkvæmt henni hefðu þeir „bara“ átt að skora 50,2 mörk.

Leikmannahópur Víkings er ekki breiður en þeir geta teflt fram átján leikmönnum eða svo sem eru svipaðir að getu. Fossvogsbúar mega þó ekki við miklum skakkaföllum eins og gerðist með varnarmenn liðsins í fyrra.

Ljósin í partíinu í Fossvoginum eru enn kveikt, kannski ekki öll en nógu mörg til að berjast um titlana sem í boði eru.