Umfjöllun, viðtöl og myndir: Breiðablik 3-1 Víkingur | Nýkrýndir Íslandsmeistarar töpuðu á Kópavogsvelli

Nýkrýndir Íslands- og bikarmeistar Víkings mættu Breiðabliki á Kópavogsvellinum í kvöld. Leiknum lauk með 3-1 sigri heimamanna sem breikka bilið í baráttunni um Evrópusætið og koma sér fjórum stigum fram fyrir liðin á eftir.

Víkingur varð í gær Íslandsmeistari eftir að Val mistókst að sigra KR. Breiðablik vottaði þeim virðingu sína með því að standa heiðursvörð þegar liðið gekk inn á völlinn.

Liðin hófu harða baráttu strax frá fyrstu mínútu, rígurinn milli félaganna hefur vaxið gríðarlega síðustu ár og líklega aldrei verið meiri en hann er nú.

Víkingar voru með yfirhöndina framan af leik og sköpuðu sér aragrúa af marktækifærum. Blikar lágu í nauðvörn og þurftu tvisvar að bjarga boltanum á línu. Gunnar Vatnhamar átti svo þrumuskot í slá örskömmu síðar.

En það voru Blikar sem tóku forystuna, markið kom upp úr ótrúlegri skyndisókn þar sem Víkingum mistókst margsinnis að taka boltann af þeim. Klæmint skipti boltanum að lokum yfir á Viktor Karl sem þrumaði að marki. Skotið var beint á markið en lak í gegnum hendur Ingvars Jónssonar og yfir línuna.

Höskuldur Gunnlaugsson, fyrirliði Breiðabliks, tvöfaldaði svo forystu heimamanna rétt fyrir hálfleik. Markið kom eftir hornspyrnu sem hann tók sjálfur stutt á Anton Loga, fékk boltann strax aftur, keyrði inn á völlinn og negldi knettinum í netið framhjá Ingvari sem átti slæman dag í markinu.

Víkingar gerðu markmannsbreytingu í hálfleik og þéttu raðir sínar í von um að minnka muninn. Seinni hálfleikurinn varð töluvert lokaðri en sá fyrri og hvorugt lið skapaði sér mörg hættuleg færi.

Eftir langa leit fundu Víkingar loks markið á 86. mínútu þegar Birnir Snær Ingason kom boltanum í netið eftir glæsilegan sprett upp völlinn. Munurinn minnkaður í eitt mark og vonin kynduð á ný.

En Jason Daði gerði svo út um allar vonir Víkinga á lokamínútu venjulegs leiktíma. Hann slapp einn í gegn eftir misreikning í vörn Víkings, gabbaði varnarmann og kláraði svo færið af öryggi.

Fleiri urðu mörkin ekki, niðurstaðan 3-1 sigur Breiðabliks gegn Víkingum í blóðugum baráttuleik.

Afhverju vann Breiðablik? 

Blikarnir mættu gíraðir til leiks og nýttu færin sín vel í fyrri hálfleiknum. Vörðust áhlaup Víkinganna og urðu ekki undir í baráttunni gegn þeim. 

Hverjir stóðu upp úr? 

Anton Logi var valinn maður leiksins af Breiðablik og er vel að því kominn. Leysti sitt hlutverk vel í hægri bakverðinum og átti stórfínan leik. 

Víkingsmegin var Birnir Snær sá eini sem átti ágætan leik í framlínunni, alltaf hættulegur og ógnandi á boltanum. 

Hvað gekk illa? 

Víkingi gekk illa að skapa sér færi í seinni hálfleik þegar mest var á þeim að halda. Óákveðnir fram á við og spiluðu illa.

Hvað gerist næst? 

Bæði lið leika á fimmtudag klukkan 19:15. Víkingur mætir FH á heimavelli og Breiðablik heimsækir Val á Hlíðarenda. 

„Aldrei gaman að koma hingað og tapa stigum“

„Bara mjög svekkjandi, það er aldrei gaman að koma hingað og tapa stigum þannig að við erum bara svekktir en spilamennskan var svosem ágæt, sérstaklega í fyrri hálfleik. En fengum klaufaleg mörk á okkur sem gaf þeim krafta til að halda áfram en yfirhöfuð mér fannst við spila fínan leik þó úrslitin fellu ekki með okkur“ sagði Sölvi Geir Ottesen, aðstoðarþjálfari Víkings, í leikslok. 

Sölvi segir spilamennsku liðsins hafa verið fína í dag en þeir hafi fengið mörk á sig sem hefði átt að koma í veg fyrir og svo hafi liðið ekki svarað nógu vel eftir að lenda undir. 

„Þetta er bara smá högg á okkur sem við svörum ekki nógu vel inni á vellinum. Tekur okkur of langan tíma að vakna aftur upp.“

Víkingur varð Íslandsmeistari í gær þegar Val mistókst að sigra KR og halda lífi í titilbaráttunni, Sölvi viðurkennir að það hafi haft áhrif á leikmenn í dag. 

„Ég held það geri það ósjálfrátt þó maður vilji ekki að það geri það. Adrenalínið og taugarnar eru kannski ekki eins hátt uppi og þú vilt hafa það, auðvitað á það ekki að skipa máli þegar mætt er á Kópavogsvöll en sjálfsagt hefur það gerst. Mér fannst samt frammistaðan alveg fín í leiknum en við fáum bara tvö hrikalega klaufaleg mörk á okkur.“

Víkingur er sem áður segir orðið Íslandsmeistari en þarf samt að klára leikina þrjá sem eftir eru. 

„Við erum búnir að búa til "winner mentality" í þessum strákum, við förum í alla leiki til að vinna þá og það mun ekkert breytast þó við séum orðnir meistarar. Ef við ætlum að fara að gefa eitthvað eftir núna þá erum við að svíkja okkur sjálfa“ sagði Sölvi að lokum.