City bar sigurorðið manni færri

Manchester City komst aftur á sigurbraut eftir tap í síðustu tveimur deildarleikjum. Manuel Akanji var rekinn af velli undir lok leiks, en það gerði ekki til og Englandsmeistararnir hirtu öll stigin þrjú.

Þetta var hinn klassíski leikur tveggja hálfleika sem fram fór í Manchester borg. City liðið bar alla yfirburði í fyrri hálfleiknum og fór með verðskuldaða tveggja marka forystu inn til búningsherbergjanna eftir mörk frá framherjunum Julian Alvarez og Erling Haaland. 

Rodri sneri aftur á völlinn í þessum leik en hann hefur misst af síðustu þremur deildarleikjum vegna leikbanns. Endurkoma hans gaf Englandsmeisturunum mikið og þeir stýrðu spilinu algjörlega framan af. 

Þegar komið var út í seinni hálfleikinn virtist blása ferskum vindum yfir Brighton liðinu, þeir héldu boltanum mun betur og fóru að leita að sér að marktækifærum. 

Ansu Fati minnkaði svo muninn fyrir gestina eftir að City hafði komist hársbreidd frá því að skora þriðja markið og gera útaf við leikinn. Brighton sóttu hratt upp vinstri vænginn með góðri skyndisókn, Kairu Mitoma kom boltanum fyrir markið og eftir misheppnaða hreinsun datt hann fyrir Ansu Fati sem setti hann í netið. 

Gestirnir reyndu hvað þeir gátu til að sækja jöfnunarmarkið og fengu enn frekari von þegar Josko Gvardiol, varnarmaður City, var rekinn af velli í uppbótartíma. Það vildi þó ekki verða að þessu sinni, leikurinn var flautaður af skömmu síðar og Brighton sátu eftir með sárt ennið.