Virtur körfuboltasérfræðingur segir að Caitlin Clark sé einstök og hrósar stigahæsta leikmanni bandaríska háskólaboltans frá upphafi einnig fyrir sendingar sínar.

Vinsældir Clark í Bandaríkjunum eru ótrúlegar. Það er uppselt á alla leiki Iowa liðsins og hún er þegar komin með risastóra auglýsingasamninga eins og hjá Nike. Hún á mestan þátt í því að fréttir úr kvennakörfunni eru nú fyrsta frétt í bandarískum miðlum.

Risastórar auglýsingar

Nike setti upp risastórar auglýsingar af henni eftir að stigametið var í höfn, auglýsingar sem við sjáum vanalega hjá stærstu íþróttastjörnum heims. Jú, Caitlin Clark er risastórt nafn í bandarísku íþróttalífi.

Það er heldur ekki slæmt að vera nýbúin að slá stigameti karla og kvenna í háskólaboltanum en fá um leið mikið lof fyrir það hvernig þú spilar uppi liðsfélaga þína.

Körfuboltagoðsögnin Rebecca Lobo átti sjálf farsælan feril í bæði háskóla og WNBA en hún hefur síðan unnið sem körfuboltasérfræðingur í bandarísku sjónvarpi. Hún er mikill aðdáandi Clark. Lobo skrifaði pistil um afrek Clark fyrir ESPN.

Stigin segja bara hluta af sögunni

„Caitlin Clark er besti sóknarleikmaðurinn sem við höfum séð í kvennaháskólakörfuboltanum á síðustu þremur áratugum. Öll stigin hennar, sem eru sér á báti, segja samt bara aðeins hluta af sögunni. Við höfum séð ótrúlega skorara eins og Lynette Woodard, Kelsey Plum, Maya Moore, Jackie Stiles og Brittney Griner. Við höfum aldrei séð konu spila svona,“ skrifaði Rebecca Lobo um Clark.

„Hún er mjög stöðug í því að hitta af mjög löngu færi og er líka tilbúinn að láta vaða langt fyrir utan. Það gerir hana öðruvísi. Á þessu tímabili hefur hún skoraði 88 þrista af meira en 25 feta færi (7 metrar). Enginn önnur hefur skorað meira en 51 slíka körfu á einu tímabili á síðustu fimm árum,“ skrifaði Loco.

„Varnarmenn þurfa að fara að dekka hana um leið og hún fer yfir miðju því annars er hún komin í skotfæri,“ skrifaði Loco.

Líkir hennir við Curry og Lillard

„Steph Curry og Damian Lillard eru þeir einu sem koma upp í hugann þegar ég velti fyrir mér viðlíka leikmönnum. Clark hefur líka gríðarleg áhrif á það hvernig mótherjarnir stilla upp vörnum sínum og hún býr til mikið vinnupláss fyrir liðsfélaga sína,“ skrifaði Loco.

„Það sem lyftir henni enn hærra er samt sendingagetan hennar. Hún er ekki því ekki aðeins besti skorarinn heldur einnig besti alhliða sóknarleikmaðurinn. Clark er besta hraðaupphlaupssendingakona síðan Sue Bird og Diana Taurasi komu fram,“ skrifaði Loco.

„Við höldum upp á það að Clark sé nú orðin sú stigahæst í sögunni hjá bæði körlum og konum eftir að hún sló met Pete Maravich á sunnudaginn. Við getum heldur ekki litið fram hjá því að hún er í sjötta sæti yfir flestar stoðsendingar í sögunni. Enginn annar leikmaður er inn á topp 24 í báðum þessum tölfræðiþáttum. Sabrina Ionescu var í 25. sæti i stigum en í 4. sæti í stoðsendingum. Hún kemst henni næst,“ skrifaði Loco.

„Clark er líka eini leikmaðurinn í sögu stóru deildanna sem verður efst í bæði stigum og stoðsendingum í fjögur tímabil í röð,“ skrifaði Loco en Clark spilar í BigTen deildinni.

Líka frábær liðsfélagi

„Síðast en ekki síst þá er hún frábær liðsfélagi. Þótt hún skjóti 22,6 sinnum að meðaltali í leik þá er hún mjög sjaldan að þvinga skotin. Ég hef ekki séð hana skjóta af löngu færi þegar liðsfélagi hennar er opinn. Ég hef aldrei séð liðsfélaga hennar svekkja sig yfir því að hafa ekki fengið boltann frá henni. Pirrar Clark sig stundum yfir því þegar liðsfélagar hennar missa boltann? Jú, vissulega en það fer ekki á milli mála að hún var að svekkja sig yfir mistökunum en ekki yfir leikmanninum. Það er líka augljóst að allir liðsfélagarnir hennar elska það að spila með henni,“ skrifaði Loco.

„Það er sjaldgæft að sjá leikmann koma fram sem breytir því hvernig íþróttin er spiluð. Það hefur Clark gert. Stigaskor hennar í samblandi við sendingar hennar gera hana að besta sóknarmanni sem ég hef séð í þau 35 ár sem ég hef spilað eða fylgst með kvennaháskólakörfuboltanum,“ skrifaði Loco.