Besta-spáin 2024: Knattspyrnuhald undir Jökli

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Íslandsmeistara Víkings og Stjörnunnar laugardaginn 6. apríl.

Íþróttadeild spáir Stjörnunni 4. sæti Bestu deildarinnar í sumar og liðið endi einu sæti neðar en í fyrra.

Eftir 2-1 tap fyrir Fram í 6. umferð á síðasta tímabili tóku Stjörnumenn í gikkinn, ráku Ágúst Gylfason og hækkuðu aðstoðarmann hans, Jökul Elísabetarson, í tign. Stjarnan vann fyrsta leikinn undir hans stjórn, 4-0, og gengið það eftir lifði sumars var frábært. Stjörnumenn spiluðu 21 leik eftir að Jökull tók við, unnu þrettán, gerðu fjögur jafntefli og töpuðu fjórum. Markatalan var 47-15.

Stjarnan endaði í 3. sæti og náði Evrópusæti þrátt fyrir að hafa selt Ísak Andra Sigurgeirsson til Norrköping í júlí. Eggert Aron Guðmundsson tók bara við keflinu og var sennilega besti leikmaður deildarinnar síðasta þriðjung tímabilsins. Eins og við mátti búast var hann seldur út í vetur. Það er því spurning hver tekur við keflinu að þessu sinni.

Róbert Frosti Þorkelsson, Adolf Daði Birgisson og Helgi Fróði Ingason eru líklegir til þess og þá klæjar Óla Val Ómarsson og Guðmund Baldvin Nökkvason eflaust í fingurna að sýna sig og sanna á nýjan leik. 

Þeir voru lánaðir til Stjörnunnar frá liðum í Svíþjóð en auk þeirra fengu Garðbæingar Örvar Eggertsson frá HK og Matthias Rosenörn frá Keflavík. Sá síðastnefndi berst um markvarðastöðuna við Árna Snæ Ólafsson sem átti frábært tímabil í fyrra og hélt meðal annars tíu sinnum hreinu í Bestu deildinni.

Hilmar Árni Halldórsson varð betri eftir því sem leið á síðasta tímabil, eftir að hafa misst af öllu sumrinu 2022 vegna hnémeiðsla. Stuðningsmenn Stjörnunnar eru eflaust spenntir að sjá Breiðhyltinginn spila með öllum ungu og spennandi strákunum í Garðabænum. 

Svo er það Emil Atlason sem hefur skorað eins og óður maður undanfarin tvö tímabil og fékk gullskóinn í fyrra. Ef hann verður í sama formi í sumar eru Stjörnumönnum allir vegir færir.

Eftir frábært gengi eftir að Jökull tók við í fyrra er pressan talsverð á Stjörnuna að gera sig gildandi í baráttunni um titilinn í sumar. Og það er innistæða fyrir bjartsýni. 

Í leikmannahópnum er góð blanda yngri og eldri leikmanna og Jökull er einn mest spennandi þjálfari landsins. En hvort það er nóg til að endurtaka leikinn frá 2014, þegar Stjarnan varð Íslandsmeistari í fyrsta og einn sinn, verður að koma í ljós.