Liverpool mætir Newcastle á Wembley eftir stór­sigur á Spurs

Liverpool tryggði sér i kvöld sæti í fyrsta úrslitaleik tímabilsins þegar Liverpool vann 4-0 stórsigur á Tottenham í seinni undanúrslitaleik liðanna í enska deildabikarnum.

Tottenham vann fyrri leikinn 1-0 á heimavelli en Liverpool liðið er erfitt heima að sækja á Anfield og sannaði það í kvöld. Liverpool fór í úrslitaleikinn með því að vinna samanlagt 4-1.

Úrslitaleikurinn fer fram sunnudaginn 16. mars á Wembley en Newcastle tryggði sér sitt sæti með því að slá út Arsenal í gær.

Liverpool liðið tók frumkvæðið í upphafi leiks og það var fljótlega ljóst að þetta gæti orðið langt kvöld fyrir gestina í Tottenham.

Cody Gakpo skoraði eina mark fyrri hálfleik en það kom á 34. mínútu eftir stoðsendingu frá Mohamed Salah. Liverpool var betra liðið í fyrri hálfleik en Tottenham átti líka sína spretti.

Salah kom Liverpool síðan í 2-0 í leiknum og yfir í einvíginu þegar hann skoraði úr vítaspyrnu á 51. mínútu. Vítið fiskaði Darwin Nunez á Antonin Kinsky í marki Tottenham.

Liverpool liðið var miklu betra liðið í seinni hálfleiknum og keyrði síðan yfir Tottenham menn á lokakaflanum.

Dominik Szoboszlai skoraði þriðja markið eftir stoðsendingu frá Conor Bradley og fyrirliðinn Virgil van Dijk það fjórða með skalla eftir hornspyrnu Alexis Mac Allister.

Liverpool vann enska deildabikarinn í fyrra eftir sigur á Chelsea í vítakeppni í úrslitaleiknum. Nú getur liðið unnið þennan bikar annað árið í röð og í þriðja sinn á fjórum árum. Ekkert félag hefur unnið enska deildabikarinn oftar en Liverpool sem vann hann í tíunda skiptið í fyrra.