„Stígðu út úr torfkofanum, kona“

Líkt og greint var frá á Vísi í fyrradag var svar Ingu við fyrirspurn Júlíusar Viggós Ólafssonar um málið heldur afgerandi. Atvinnuhnefaleikar hafa verið bannaðir hér á landi samkvæmt lögum frá árinu 1956.

Í svari Ingu við fyrirspurninni er vísað í áhættu sem fylgi ítrekuðum höfuðhöggum.

Öryggisreglur, lækniseftirlit og tímabundin keppnisbönn geti dregið úr bráðri áhættu. Þau úrræði geti hins vegar ekki komið í veg fyrir áhættuna sem fylgi endurteknum höfuðhöggum, að því er segir í svarinu.

Íslenski atvinnuhnefaleikakappinn Emin Kadri tjáði sig um málið í gær, en hann getur eðli málsins samkvæmt, ekki sinnt þeirri atvinnu sinni hér á landi heldur aðeins erlendis.

„Mér finnst algjörlega óboðlegt og jafnvel frekar hrokafullt að hæstvirtur ráðherra okkar Íslendinga telji sig vita betur um hvers konar lög ætti að setja, um hvað fólk má og má ekki gera, heldur en allur heimurinn. Jafnvel hvert einasta Norðurland í okkar nágrenni, sem er löngu búið að leyfa þetta,“ sagði Emin í myndbandsfærslu á Instagram.

Hvergi bannað nema í Íran, Norður-Kóreu og á Íslandi

Ísland er eitt aðeins þriggja landa á heimsvísu sem ekki heimila atvinnuhnefaleika, þó áhugamannahnefaleikar séu hér leyfðir. Auk þess að vera bönnuð hér á landi er greinin ólögleg í Norður-Kóreu og Íran.

Málið var til umræðu í hlaðvarpinu Besta sætið í gær þar sem Henry Birgir Gunnarsson tók undir gagnrýni Emins á fyrirhugað aðgerðaleysi ráðherra hvað hnefaleikana varðar.

„Ég ætla bara að skamma óvinsælasta stjórnmálamann landsins, Ingu Sæland. Ég ætla bara vinsamlegast að biðja hana að setja sig í stand. Því árið er 2026 og atvinnuhnefaleikar eru hvergi bannaðir nema á Íslandi og í Norður-Kóreu [innsk. einnig bannað í Íran] og hún ætlar ekki að breyta því,“ segir Henry í þættinum. Aron Guðmundsson tók undir.

„Þegar við erum með okkar fólk sem er að reyna að koma sér á framfæri. Allar þjóðir sem við berum okkur saman við, jafnan í öllum flokkum, eru með þetta leyfilegt en við ætlum einhvern veginn að hafa þetta bannað,“ segir Aron áður en Henry grípur orðið á ný.

„Það er löngu búið að leyfa allt svona en við ætlum að halda áfram að stöðva þetta. Þetta er óþolandi hegðun. Og fyrir hvern er þetta? Hvað kemur henni við hvað annað fólk er að gera? Ef það vill boxa eða eitthvað annað. Stígðu út úr torfkofanum, kona,“ segir Henry Birgir.

Hlusta má á þáttinn í spilaranum og á öllum helstu hlaðvarpsveitum.