Kane mætti en Blikar slógu út meistara Grinda­víkur

Blikarnir unnu ekki aðeins Grindvíkinga heldur rassskelltu þá í Smáranum með 24 stiga sigri, 109-85, og tryggðu sér sæti í sextán liða úrslitunum.

Adrian Mcintyre var frábær hjá Blikum með 27 stig, 9 fráköst og 11 stoðsendingar. Viktor Máni Steffensen skilaði 17 stigum, Hugo Ivan Catani var með 15 stig og Orri Guðmundsson skoraði 14 stig. Eysteinn Bjarni Ævarsson var líka öflugur með 11 stig og 11 fráköst af bekknum.

Deandre Kane missti af tveimur fyrstu leikjum Grindavíkur í deildinni en var mættur í kvöld. Hann skilaði 22 stigum á 22 mínútum af bekknum en það dugði skammt.

Kane var stigahæstur hjá Grindavík en Arnór Tristan Helgason skoraði 15 stig og Unnsteinn Rúnar Kárason var með 14 stig.

Álftanes vann öruggan 22 stiga útisigur á ÍA, 95-73, þar sem Sigurður Pétursson var með 26 stig og Martins Laksa bætti við 18 stigum. Gojko Sudzum skoraði 19 stig fyrir Skagamenn.

Tindastóll vann 23 stiga útisigur á 1. deildarliði Hauka á Ásvöllum, 103-80. Dee Bost var með 21 stig og 11 stoðsendingar en Ade Murkey var með 16 stig og 10 fráköst. Taiwo Hassan Badmus skoraði 15 stig og tók 13 fráköst og Sigtryggur Arnar Björnsson skoraði 15 stig. Frosti Valgarðsson og Hilmir Hallgrímsson voru stigahæstir hjá Haukum með 18 stig. KV sló út sameiginlegt lið Laugdæla og Uppsveita, með 115-103 sigri.

Áður höfðu Bónusdeildarliðin Stjarnan, ÍR, Valur, Njarðvík, KR, Höttur og Sindri tryggt sig áfram auk sameiginlegs liðs Aþenu og Leiknis auk Hamars. Snæfell, Keflavík og Ármann sátu hjá og fóru beint í sextán liða úrslit.