Lukaku með tvö gegn Skotum og Belgar í góðum málum

Belgar eru með fullt hús stiga í I-riðli undankeppni EM 2020 eftir 3-0 sigur á Skotum í Brussel í kvöld.

Romelu Lukaku skoraði tvö marka Belga. Hann hefur nú skorað 48 mörk fyrir belgíska landsliðið.

Lukaku kom Belgum yfir með skalla eftir sendingu Edens Hazard í uppbótartíma fyrri hálfleik. Hann bætti svo öðru marki við á 57. mínútu. Lukaku fylgdi þá eftir skoti Kevins De Bruyne sem David Marshall, markvörður Skota, varði.

De Bruyne skoraði svo þriðja mark Belga í uppbótartíma.

Belgía er með tólf stig á toppi riðilsins, þremur stigum á undan Rússlandi.

Skotland er hins vegar í 4. sæti riðilsins með sex stig.