Forseti Juventus til London

Samkvæmt Sky fréttastofunni er Luciano Moggi, forseti Juventus, mættur ásamt fylgdarliði sínu til London til að ræða við Arsenal um hugsanleg kaup á Patrick Vieira, franska miðvallarleikmanninum í liði Arsenal. Líklegt kaupverð er talið vera um 11 milljónir punda fyrir Vieira sem er 29 ára gamall. Auk þess að hafa verið lykilmaður í liði Arsenal í tæpan áratug er Vieira fyrirliði liðsins. Fyrr í dag hvatti landi Vieira, Zinedine Zidane, hann til að reyna fyrir sér á nýjum stað.