Býst við að endurskoðun verði rædd á fundi

Forseti ASÍ segist fastlega gera ráð fyrir því að forsætisráðherra verði beðinn um að endurskoða úrskurð Kjaradóms á fundi sínum með fulltrúum vinnumarkaðarins á þriðjudag. Formaður Kjaradóms segir að dómnum sé falið vanþakklátt og vandasamt hlutverk. Nauðsynlegt sé að finna leið til að ákvarða laun kjörinna fulltrúa og æðstu embættismanna sem sæmileg sátt geti verið um.

Formenn stjórnarandstöðunnar skrifuðu forsætisráðherra í gær og óskuðu eftir því að þing yrði kallað saman milli jóla og nýárs til að ræða launahækkanirnar og launamun í landinu. Ráðherrann hefur kallað forystumenn vinnumarkaðarins á sinn fund á þriðjudag. Grétar Þorsteinsson forseti ASÍ segist gera fastlega ráð fyrir því að ráðherrann verði beðinn um að endurskoða úrskurð kjaradóms. Ríkisstjórnin muni síðan ákveða framhaldið. Ari Edvald framkvæmdastjóri SA segir nauðsynlegt að fara yfir málið með ráðherranum. Ekkert annað liggi fyrir á þessari stundu.

Ef ríkisstjórnin ákveður að hrófla við úrskurði kjaradóms þarf annars vegar að setja bráðabirgðalög eða kalla þingið saman og setja ný lög.

Greinargerð Garðars Garðarssonar formanns Kjaradóms barst forsætisráðherra í gær. Þar skýrir hann forsendur dómsins fyrir ákvörðun sinni um laun æðstu embættismanna.

Garðar Garðarsson segir Kjaradóm hafa átt tvo kosti og báða vonda. Annars vegar að fylgja fyrirmælum laga og færa launin að þeim viðmiðunarmörkum sem dómurinn hafði sett og skapa hugsanlega einhverja óánægju eða að hækka launin aðeins um tvö komma fimm prósent. Garðar segir að kjaradómur hafi oft bent á að þörf væri á að endurskoða fyrirkomulagið sem kjaradómur byggir á, en varað jafnframt við því að rasað yrði um ráð fram í hita leiksins. Huga þyrfti að því að ríkið væri í samkeppni á markaði um hæfasta starfsfólkið.