Geldof fær gítar að gjöf

Tónlistarmaðurinn heimsþekkti Bob Geldof fékk heldur sérstakan gítar að gjöf í Kólumbíu í fyrradag. Hann er smíðaður úr riffli sem skæruliðar afhentu yfirvöldum. Það var þekktur kólumbískur götulistamaður, Cesar Lopez, sem smíðaði gítarinn og afhenti síðan Geldof hljóðfærið.

Lopez segir gítarinn tákn um frið og sátt. Yfirvöld í Kólumbíu hafa heitið því að afhenda Lopez fleiri vopn sem skæruliðar hafa látið frá sér svo hægt sé að gera úr þeim hljóðfæri.