Trefjarnar voru úr fötum Kristins Veigars

Efnisþræðirnir sem fundust á bifreið mannsins, sem handtekinn var í tengslum við bílslysið í Keflavík, þegar fjögurra ára gamall drengur lést, voru úr fötum drengsins. Lögregla krafðist fjögurra vikna gæsluvarðhalds yfir manninum í dag en Héraðsdómur Reykjaness úrskurðaði hann í farbann til 8. janúar. Þetta kemur fram í tilkynningu frá lögreglunni.

Tilkynningin fer hér eftir

Í tengslum við rannsókn á banaslysi sem varð á Vesturgötu í Reykjanesbæ föstudaginn 30. nóvember, þar sem fjögurra ára drengur lét lífið, sendi lögreglan á Suðurnesjum, með aðstoð embættis ríkislögreglustjóra, til tæknirannsóknar hjá tæknideild norsku lögreglunnar efnisþræði sem fundust á bifreið sem haldlögð var í þágu rannsóknar slyssins.

Niðurstaða þeirrar rannsóknar liggur nú fyrir og staðfestir hún að téðir efnisþræðir samsvara efnisþráðum sem teknir voru úr fatnaði hins látna. Styður niðurstaðan enn frekar þá tæknirannsókn sem gerð hafði verið á bifreiðinni og unnin var af tæknideildum lögreglu á Suðurnesjum og á höfuðborgarsvæðinu með aðkomu réttarlæknis og sérfræðings frá fræðslumiðstöð bílgreina.

Meintur ökumaður bifreiðarinnar hefur þráfaldlega neitað að hafa valdið slysinu, en hann hefur setið í gæsluvarðhaldi frá 2. desember síðastliðnum. Lögreglan á Suðurnesjum krafðist þess í héraðsdómi Reykjaness í dag að honum yrði gert að sæta gæsluvarðhaldi í fjórar vikur. Héraðsdómur Reykjaness úrskurðaði að hann skyldi sæta farbanni til 8.janúar næstkomandi. Sá úrskurður var af hálfu lögreglu þegar kærður til Hæstaréttar Íslands.

Rannsókn málsins er umfangsmikil og flókin og að svo stöddu verða ekki veittar frekari upplýsingar um hana.