Skuggi Skuggason í Skuggasundi Þráinn Bertelsson skrifar 7. júlí 2008 06:00 Ég hélt að sá tími myndi aldrei koma að ég þyrfti að fara á mótmælafund til að biðja íslensk yfirvöld að stilla sig um að ata hendur sínar saklausu blóði - en það átti fyrir mér að liggja að fara í mótmælastöðu upp í Skuggasund, þar sem dómsmálaráðherra hefur skrifstofu. Ég er ekki að grínast. Dómsmálaráðuneyti Íslands stendur við Skuggasund. Sá úrskurður að flytja úr landi - frá eiginkonu og nýfæddu barni - mann sem á yfir höfði sér að verða drepinn í heimalandi sínu er ógnvænlegur. Ekki síst vegna þess að huggun mín og margra annarra síðustu hálfa öld hefur verið sú að þótt Flokkurinn sem mótað hefur íslenskt þjóðfélag víli ekki fyrir sér að tortryggja, uppnefna, njósna um, hefta eða eyðileggja starfsframa þeirra sem þora að setja sig upp á móti vilja hans séu menn þó alltént ekki í beinni lífshættu. Með orðinu „uppnefna" á ég við það meiðyrði að kalla andstæðinga sína „kommúnista". Aðferð sem gaf góða raun í skammvinnu galdrafári McCarthys í Bandaríkjunum. Nú er svo komið að Flokkurinn virðist ekki lengur víla það fyrir sér að senda saklaust fólk í böðulshendur. Úr því að „Lebensraum" er orðið svona takmarkað á Íslandi vil ég gera stjórnvöldum það tilboð að flytja mig til Ítalíu og bjóða mig fram sem gísl í staðinn fyrir Paul Ramses, svo að hann geti fengið að sjá litla barnið sitt aftur, en ég komist út úr skugga hinnar helbláu handar. Nýjasta hugsjón Flokksins er að leynileg lögregla fái „framvirkar rannsóknarheimildir". Sem sé heimildir til að rannsaka manneskjur eftir geðþótta án þess að nokkur grunur liggi fyrir um að þær hafi gerst brotlegar við lög eða hafi lögbrot í hyggju. Ég veit ekki af hverju fólk kaus Flokkinn, en það var ekki til þess arna sem þjóðin veitti Samfylkingunni það umboð sem hún hefur. Ég mótmæli mannhatri og miskunnarleysi í nafni þeirra kynslóða sem að mér standa og hafa lifað og dáið frá landnámstíð í trú á frelsi og framtíð þessa lands og allra heimsins barna. Allar komu þær kynslóðir naktar í heiminn og enginn krafði þær um vegabréf til að fá að lifa. Farðu burt, Skuggi Skuggason í Skuggasundi. Farðu burt, helbláa hönd. Viltu birta grein á Vísi? Sendu okkur póst. Senda grein Þráinn Bertelsson Mest lesið Stormur í Þjóðleikhúsinu Bubbi Morthens Skoðun Mega bara íslenskir karlmenn nauðga konum á Íslandi? Guðný S. Bjarnadóttir Skoðun Nýbygging þýðir ekki gallalaus eign Annþór Kristján Karlsson Skoðun 120km hraði á Keflavíkurveginum og netsölur með áfengi Jón Páll Haraldsson Skoðun Auðbeldi SFS Örn Bárður Jónsson Skoðun Norska leiðin hefur gefist vel – í Póllandi Heiðrún Lind Marteinsdóttir Skoðun Opið hús fyrir útvalda Björn Brynjúlfur Björnsson Skoðun Opið bréf til mennta- og barnamálaráðherra Gunnar Örn Vopnfjörð Þorsteinsson Skoðun Af hverju hræðist fólk kynjafræði? Eydís Ásbjörnsdóttir Skoðun Börn í skugga stríðs Hólmfríður Jennýjar Árnadóttir Skoðun
Ég hélt að sá tími myndi aldrei koma að ég þyrfti að fara á mótmælafund til að biðja íslensk yfirvöld að stilla sig um að ata hendur sínar saklausu blóði - en það átti fyrir mér að liggja að fara í mótmælastöðu upp í Skuggasund, þar sem dómsmálaráðherra hefur skrifstofu. Ég er ekki að grínast. Dómsmálaráðuneyti Íslands stendur við Skuggasund. Sá úrskurður að flytja úr landi - frá eiginkonu og nýfæddu barni - mann sem á yfir höfði sér að verða drepinn í heimalandi sínu er ógnvænlegur. Ekki síst vegna þess að huggun mín og margra annarra síðustu hálfa öld hefur verið sú að þótt Flokkurinn sem mótað hefur íslenskt þjóðfélag víli ekki fyrir sér að tortryggja, uppnefna, njósna um, hefta eða eyðileggja starfsframa þeirra sem þora að setja sig upp á móti vilja hans séu menn þó alltént ekki í beinni lífshættu. Með orðinu „uppnefna" á ég við það meiðyrði að kalla andstæðinga sína „kommúnista". Aðferð sem gaf góða raun í skammvinnu galdrafári McCarthys í Bandaríkjunum. Nú er svo komið að Flokkurinn virðist ekki lengur víla það fyrir sér að senda saklaust fólk í böðulshendur. Úr því að „Lebensraum" er orðið svona takmarkað á Íslandi vil ég gera stjórnvöldum það tilboð að flytja mig til Ítalíu og bjóða mig fram sem gísl í staðinn fyrir Paul Ramses, svo að hann geti fengið að sjá litla barnið sitt aftur, en ég komist út úr skugga hinnar helbláu handar. Nýjasta hugsjón Flokksins er að leynileg lögregla fái „framvirkar rannsóknarheimildir". Sem sé heimildir til að rannsaka manneskjur eftir geðþótta án þess að nokkur grunur liggi fyrir um að þær hafi gerst brotlegar við lög eða hafi lögbrot í hyggju. Ég veit ekki af hverju fólk kaus Flokkinn, en það var ekki til þess arna sem þjóðin veitti Samfylkingunni það umboð sem hún hefur. Ég mótmæli mannhatri og miskunnarleysi í nafni þeirra kynslóða sem að mér standa og hafa lifað og dáið frá landnámstíð í trú á frelsi og framtíð þessa lands og allra heimsins barna. Allar komu þær kynslóðir naktar í heiminn og enginn krafði þær um vegabréf til að fá að lifa. Farðu burt, Skuggi Skuggason í Skuggasundi. Farðu burt, helbláa hönd.