Íslenskt kvenfólk aðeins í þriðja sæti

„Ég get vel skilið þetta,“ segir tískufrömuðurinn Karl Berndsen. Þrátt fyrir að íslenskt kvenfólk hafi hingað til verið talið það fegursta í heiminum er það aðeins í þriðja sæti ef marka má stefnumótasíðuna Beautifulpeople.com. Alls fá 66% íslenskra kvenna að birta persónuupplýsingar um sig á síðunni, sem er þriðja hæsta hlutfallið í heiminum. Norskar konur eru í efsta sætinu því 75% þeirra fá aðgang að síðunni. Næstar á eftir koma sænskar konur, með 68% hlutfall.

„Þó að þetta séu voðalegar blondínur held ég að þær séu meira í tengslum við sína kvenlegu fegurð,“ segir Karl um sænsku og norsku konurnar. „Ég held að við séum undir rosalega miklum áhrifum frá Ameríku og New York-konunum. Þær eru harðari týpur en þessar skandinavísku,“ segir hann um íslenskt kvenfólk. „Ef þú ferð til Kaupmannahafnar er til dæmis mikið af síðu fallegu hári þar og þær eru kvenlegri. Þær eru allar fallegar en falla samt voðalega mikið undir sama hattinn,“ segir hann. „Íslenskar konur eru áberandi fallegar en ekki eins fallegar í heild sinni.“

Það er hægara sagt en gert að fá aðgang að Beautifulpeople.com því frá því að síðan var stofnuð árið 2002 hefur tveimur milljónum umsækjenda verið neitað um aðgang vegna þess að þeir þykja ekki nógu fallegir.

Sænskir karlmenn virðast vera fegurstir samkvæmt síðunni því 65% þeirra fá aðgang. Í öðru sæti eru Braslíumenn með 45% hlutfall og Danir eru í því þriðja með 40%. Aðeins 12% breskra karla komast aftur á móti inn á síðuna, auk þess sem 9% Rússa og Pólverja hljóta náð fyrir augum hennar. Þessar tölur koma Karli ekki á óvart. „Þetta eru voðalegir gel-piltar og meira „pretty boys“ en aðrir,“ segir hann um sænsku karlmennina og þykir honum þeir fullmiklir metrómenn fyrir sinn smekk. -fb