Bruni Engar úrbætur að ráði voru gerðar á Hótel Valhöll eftir að svört skýrsla um ástand hússins var birt árið 2006. Þar kom fram að töluvert skorti á að húsið uppfyllti kröfur um brunavarnir. Hótelið brann til kaldra kola í gær.
„Það kemur fram í skýrslunni að þetta er slysagildra þannig að fyrst eldur varð laus var ég ekki hissa á þessum endalokum," segir Þorsteinn Gunnarsson arkitekt, annar tveggja sem unnu skýrsluna.
Eldur varð laus í Hótel Valhöll á fimmta tímanum í gær. Flest bendir til þess að eldsupptök hafi verið í reykháf í eldhúsi, segir Úlfar Þórisson, sem tók við rekstri hótelsins í maí síðastliðnum.
Einn starfsmanna hótelsins þurfti aðhlynningu vegna reykeitrunar, og var hann fluttur á Landspítalann í Reykjavík. Aðra sakaði ekki í brunanum.
„Þetta gerðist allt mjög hratt og húsið fylltist fljótlega af reyk," segir Úlfar. Hann segir húsið hafa verið rýmt um leið og eldurinn kviknaði. Fáir voru á hótelinu þegar eldurinn kviknaði, en til stóð að slá upp grillveislu um kvöldið og halda tónleika.
Húsið var alelda þegar slökkviliðsmenn frá Brunavörnum Árnessýslu komu á staðinn. Þeir börðust við eldinn ásamt slökkviliðsmönnum frá höfuðborgarsvæðinu, en fengu lítið við eldinn ráðið.
Húsið er mikið skemmt og talið ónýtt. Slökkviliðsmenn unnu fram eftir kvöldi við að slökkva glæður, og til stóð að halda vakt við húsið í nótt.
