Íslenskar konur sýna Sultan áhuga

Hæsti maður heims, Sultan Kösen, hefur vakið stormandi lukku hér á landi. Risinn lenti á Íslandi seint í gærkvöldi og fór beint upp á hótel þar sem hann svaf úr sér flugþreytuna. Hann hefur síðan verið að kynna Heimsmetabók Guiness í dag og hitti meðal annars blaðamenn á Hótel Loftleiðum. Samkvæmt heimildum Vísis hafa nokkrar íslenskar konur haft samband við útgefanda bókarinnar og lýst yfir áhuga á að hitta þennan magnaða mann.

Sultan er hér á vegum Forlagsins sem gefur út Heimsmetabók Guiness. Á blaðamannafundi í dag sagðist Sultan kunna vel við land og þjóð, enda hefði verið vel tekið á móti honum þann stutta tíma sem hann hefur dvalið hér á landi.

Hann hefur einnig sjálfur sagt að hann sé ánægður með þá athygli sem hann hefur fengið í kjölfar þess að heimsmetið fékk staðfest. Hann sér ákveðna möguleika í því að verða frægur. Þannig eigi hann auðveldara með að komast í kynni við stúlkur, en hann dreymir um að verða ástfanginn og eignast konu.

Vísir sagði frá því í gær að einstæðar konur sem séu veikar fyrir hávöxnum mönnum ættu því að sjá sér leik á borði og mæta í Smáralindina á morgun, þar sem Sultan mun árita bókina.

Ekki stóð á viðbrögðum.

Samkvæmt því sem Vísir kemst næst hafa þó nokkrar konur haft samband við Forlagið og óskað eftir því að fá að hitta risann. Ekki fylgdi þó sögunni hvort Forlagsmenn hefðu tekið niður nöfn og númer og fært risanum.

Annars var Sultan í skýjunum með sérsmíðaðan stól og rúm sem hann fékk upp á herbergi til sín. Hann sagðist hafa ferðast til margra landa undanfarið og yfirleitt hefði nokkrum rúmum verið splæst saman. Þessi þjónusta hefði náð nýjum hæðum og hann hefði sofið eins og engill í alla nótt. Helst vildi hann fá að taka stólinn með sér þegar hann yfirgefur landið.

Hótel Loftleiðir hafa einnig ákveðið að halda herbergi Sultans óbreyttu og nefna það í höfuðið á risanum. Gestir hótelsins eiga því kost á því í framtíðinni að leigja herbergið sem risinn svaf í. Þar geta þeir sest í stólinn og hoppað í rúminu.

Þess ber að geta að Sultan verður gestur hjá Loga í Beinni á Stöð 2 í kvöld.