Hljómsveitin Þeyr kemur saman í Norræna húsinu

„Þetta verður svolítið hátíðlegt. Þetta verður ekki svona rokk og ról eins og Rúdólf eða Killer Boogie,“ segir Guðlaugur Kristinn Óttarsson, gítarleikari hinnar goðsagnakenndu hljómsveitar Þeys.

Þeyr kemur fram á 100 ára afmæli íslensku hljómplötunnar í Norræna húsinu 23. ágúst næstkomandi. Hljómsveitin hætti árið 1983 eftir stuttan, en farsælan feril sem hófst, að sögn Guðlaugs, fyrir alvöru þegar hin eiginlega Þeyr varð til í janúar 1981.

„Þetta verður táknrænn gjörningur,“ segir Guðlaugur. „Sigtryggur [Baldursson, trommari] verður ekki með, ég veit ekki með Þorstein. Hann er búinn að vera neðanjarðar í 25 ár.“ Guðlaugur segir að hann, Hilmar Örn Agnarsson bassaleikari og söngvarinn Magnús Guðmundsson verði fulltrúar hljómsveitarinnar ásamt allsherjargoðanum Hilmari Erni Hilmarssyni. „Svo verðum við með unga tónlistarmenn sem ætla að stíga á stokk og flytja Þeysverk,“ segir Guðlaugur. „Lögin verða í allt annarri útsetningu með strengjaútsetningar. Prógrammið er að skýrast – það er mánuður í þetta. Við verðum líka með myndasýningar og fyrirlestur.“

Hljómplötuklúbburinn Íslensk tónlist stendur fyrir dagskrá í Norræna húsinu í tilefni af afmæli íslensku plötunnar. Þá verða 100 ár frá útgáfu Dalvísa með Pétri A. Jónssyni. Kynnir verður Freyr Eyjólfsson og ásamt Þey koma meðal annars Garðar Thor Cortes og Ragnar Bjarnason fram.

„Prógrammið er fyrst og fremst helgað 100 ára afmæli íslensku hljómplötunnar og þar sem Þeysararnir voru stór þáttur í að starta þessari rokkbylgju á Íslandi var eðlilegt að við værum með,“ segir Guðlaugur.

Er möguleiki á því að á næsta ári komi hljómsveitin saman og haldi eins og eina rokktónleika? „Þetta er allavega fyrsta skrefið nú þegar menn eru farnir að tala saman og útsetja tónlistina. En við höfum alltaf haft þá stefnu að þegar Þeysararnir kæmu saman myndum við gera nýtt efni. Sýna hvernig þeir hefðu þróast ef þeir hefðu haldið áfram.“

atlifannar@frettabladid.is