Jónsvaka á Jónsmessu

Listahátíðin Jónsvaka verður haldin í fyrsta sinn um helgina í miðbæ Reykjavíkur. Markmiðið er að kynna unga íslenska listamenn.

„Þessi tími ársins er alveg svakalega skemmtilegur og það vantaði eitthvað að gerast núna um mitt sumarið,“ segir Harpa Fönn Sigurjónsdóttir hjá Framkvæmdafélagi listamanna sem stendur ásamt fleirum að listahátíðinni Jónsvöku.

Þetta er í fyrsta sinn sem hátíðin er haldin en hún mun fara fram dagana 24.-27. júní í miðbæ Reykjavíkur. „Nágrannalönd okkar hafa öll hefð fyrir því að halda Jónsmessuhelgina hátíðlega og því kominn tími á að við gerum eitthvað hér, í landinu þar sem sólin sest ekki,“ segir Harpa. Hátíðin einbeitir sér að ungum listamönnum og stefnir þar saman ólíkum listgreinum. „Það verður hönnun, myndlist, sviðslist, tónlist og ljósmyndum. Það má eiginlega segja að hátíðin fari yfir öll listasviðin.“

Það er ókeypis inn á flesta viðburði hátíðarinnar og verður meðal annars tískusýning í Listasafni Reykjavíkur á fimmtudagskvöld þar sem íslensk hönnun verður sýnd. „Sú sýning verður voðalega spennandi og flott og mæli ég með henni.“ Einnig verða tónleikar á Nasa frá fimmtudagskvöldi til laugardagskvölds. Þar koma fram nokkrar af vinsælustu hljómsveitum landsins á borð við Hjaltalín, Hjálma, Bloodgroup, Ensími og Agent Fresco en hægt er að kaupa armband á 2.900 krónur sem gildir inn á alla tónleikana, annars kostar 1.500 kr. inn á hvert kvöld.

„Ég mæli líka sérstaklega með leiðsöguferð Hannesar Óla leikara á laugardeginum þar sem hann leiðir gesti hátíðarinnar um viðburðina á skemmtilegan hátt.“ Hægt er að nálgast nánari upplýsingar um dagskrá hátíðarinnar á vefsíðunni www.jonsvaka.is - áp