Juventus vill fá Benzema

Juventus ætlar að láta til sín taka á leikmannamarkaðnum í janúar og efstur á lista félagsins er franski framherjinn Karim Benzema sem spilar með Real Madrid.

Juventus missti bæði David Trezeguet og Diego í sumar og vantar því sárlega framherja. Liðið ætlaði að treysta á Vincenzo Iaquinta en hann meiddist.

Benzema hefur ekki gengið vel hjá Real en félagið mun samt líklega ekki sleppa honum fyrr en það hefur keypt nýjan framherja til þess að leysa hann af.