„Ég átti aldrei von á þessari hlýju“

Mikil viðbrögð urðu við frétt okkar í gærkvöldi um útigangsmann sem bugaðist á skrifstofu Félagsmálastofnunar þegar hann fékk ekki þær hann bætur sem hann hafði stólað á. Hann segir að hlýhugur fólks hafi veitt sér ómetanlegan styrk.

Við sögðum í gær sögu útigangsmanns sem gekk berskerksgang á skrifstofu Félagsþjónunnar í gær eftir hað honum hafði verið tilkynnt um að hann myndi ekki fá styrk fyrir húsnæði greiddan út fyrr en eftir helgi. Það sagði hann að hefði í för með sér að hann missti af herbergi sem hann hafði orðið sér úti um og var hann niðurbrotinn yfir því að lenda aftur á götunni.

Eftir að fréttin var flutt glóðu allar símalínur á fréttastofu Stöðvar 2 þar sem svo mikill fjöldi fólks vildi koma honum til aðstoðar.

Við hittum Örvar fyrir í dag á heimili félaga hans og sagðist hann alls ekki hafa reiknað með svona miklum viðbrögðum. Sumir höfðu lagt peninga inn á bankareikning hans sem birtur var á Vísi í gær eftir fjölda fyrirspurna, þá kom maður með umslag með um tíu þúsund krónum og fólk hafði samband við hann og bauðst til að veita honum húsaskól og aðra aðstoð.

„Þessi viðbrögð komu mér alveg í opna skjöldu, það er hvað hjálpsemi og góðvilji í minn garð er mikill og fólks í eins aðstæðum."

Örvar segist vera edrú og það vilji hann vera áfram.

„Öll þau símtöl sem ég hef fengið í gær og í dag hafa styrkt mig og í raun og veru björguðu þau mér í gær. Ég átti aldrei von á þessari hlýju, velvilja og hjálpsemi. Það fá því engin orð lýst hvernig þetta styrkti mig á alla vegu," segir Örvar.