Reyndu að stinga lögreglu af eftir díselþjófnað

Tveir ungir menn á stórum pallbíl reyndu að stinga lögreglu af þegar hún stóð þá að verki við að stela dísilolíu af stórum flutningabíl í Víðidal á höfuðborgarsvæðinu í nótt.

Þeir voru byrjaðir að dæla af flutningabílnum þegar lögreglubíl bar að. Þeir stukku þá upp í pallbílinn og óku brott án þess að sinna stöðvunarmerkjum lögreglu.

Lögreglumönnum á tveimur bílum tókst skömmu síðar að króa þá af á Breiðholtsbraut og handtaka þá. Þeir verða yfirheyrðir í dag.