Ætlaði að kaupa tannbursta - endaði á því að kaupa vín fyrir 900 þúsund

Íslenskur útgerðarmaður var að skoða tannbursta þegar hann ákvað að kaupa þrjár áfengisflöskur í Fríhöfninni fyrir um 900 þúsund krónur í vikunni. Um var að ræða tvær skoskar Macallan maltviskí og eina koníaksflösku samkvæmt frétt Víkurfrétta (vf.is) um málið.

Þar kemur fram að elsta flaskan hafi verið frá árinu 1996 og var þá 50 ára afmælisútgáfa frá þessum þekkta maltviskí framleiðanda. Hún var því orðin 65 ára gömul. útgerðarmaðurinn, sem á að vera þekktur maður, keypti flöskuna á rétt tæpar 400 þúsund krónur.

Önnur flaska af Macallan-gerð seldist á um 300 þúsund krónur og svo fór koníaksflaskan á um 100 þúsund krónur. Flöskur af þessari gerð seljast fyrir háar upphæðir í útlöndum og eru gjarnan seldar á uppboðum, meðal annars hjá Sothebys.

Þessar flöskur höfðu ekki selst í Fríhöfninni í yfir 15 ár samkvæmt Víkurfréttum. Þær höfðu verið teknar úr versluninni þegar breytingar stóðu yfir og höfðu ekki verið settar fram aftur fyrr en í byrjun vikunnar. Einn starfsmanna fríhafnarinnar á að hafa sagt að þær myndu aldrei seljast en það voru ekki allir á sömu skoðun.

Útgerðarmaðurinn, sem var reyndar að leita sér að tannbursta, var á ferðinni og einn starfsmanna Fríhafnarinnar hvatti hann til að kíkja á eðalflöskurnar.

„Hann var að velja sér tannbursta og ekki á leiðinni að kaupa sér vín. Ég lýsti flöskunum aðeins fyrir honum. Þetta voru fágætar viskíflöskur og koníak og ég sagði við hann að líklega myndi einhver útlendingur kaupa flöskurnar. Þá sagði maðurinn bara: Við látum það ekki gerast. Ég tek þær allar," sagði starfsmaðurinn í viðtali við Víkurfréttir.