Ölvaður, dópaður og próflaus ökumaður skemmdi fjóra bíla

Ölvaður, dópaður og próflaus ökumaður ók á jeppa sínum utan í fjóra kyrrstæða og mannlausa bíla við Hverfisgötu í Hafnarfirði um miðnætti, síðan á ljósastaur og stöðvaðist loks á rammgerum garðbekk.

Þar handsamaði lögregla manninn eftir að vitni að akstri hans hafði kallað hana á vettvang. Jeppinn er stór skemmdur og hinir bílarnir mismunandi mikið.

Þá var ljósastaurinn svo laskaður að lögregla kallaði út menn frá rafveitunni til að aftengja hann. Ökumaðurinn gistir nú fangageymslur.