Patrik biðst af­sökunar

Þetta segir Patrik í færslu á Instagram. Ummælin féllu í þættinum Veislunni á FM957 síðastliðinn fimmtudag. Þar var hlustandi að hringja inn og greiða atkvæði í keppni um þjóðhátíðarlag. Atkvæðið féll ekki Patrik í skaut sem spurði innhringjandann sem sagðist vera á leið á Þjóðhátíð: „Mætirðu með botnlaust tjald?““

Ummælin fóru fyrir brjóstið á fjölmörgum en með botnlausu tjaldi er átt við tjald sem hægt er að varpa auðveldlega yfir áfengisdauða manneskju til þess að brjóta á henni kynferðislega. Með því að spyrja hvort einhver ætli að taka með sér botnlaust tjald spyr maður eiginlega að því hvort hann ætli sér að nauðga einhverjum.

Guðný S. Bjarnadóttir, stjórnarformaður Hagsmunasamtaka brotaþola, sagði nauðgunarbrandara Patriks Atlasonar skýrt merki um að íslenskt samfélag ætti langt í land með að uppræta nauðgunarmenningu og kynferðisofbeldi. Gæta ætti orða sinna og ekki ýta undir nauðgunarmenningu.

Vísir greindi frá því í gær að sú ákvörðun hefði verið tekin á útvarpssviði Sýnar að taka Veisluna af dagskrá. Þórdís Valsdóttir, forstöðumaður útvarps hjá Sýn, staðfesti að þátturinn heyrði sögunni til. Hún vildi ekki tjá sig frekar um málið eða staðfesta að ákvörðunin tengdust ummælum Patriks.

„Ég vil biðja alla afsökunar á ruglinu í mér með botnlausa tjaldið á FM957 og ekki síst þolendur nauðgana sem eiga ekki skilið að talað sé með þessum hætti um svo alvarlega hlut,“ segir Patrik. Hann biður Gústa B, sem haldið hefur úti Veislunni á FM í á þriðja ár, sérstaklega afsökunar.

„Einnig vil ég biðja Gústa vin minn afsökunar á því að hann hafi lent í vandræðum yfir þessum lélega brandara mínum sem ég á einn sök á,“ segir Patrik. 

Patrik og Gústi eru ekki bara bestu vinir heldur miklir samstarfsmenn. Patrik, í búningi Prettyboitjokko, er einn vinsælasti tónlistarmaður landsins og mikið bókaður í veisluhöld. Þar er Gústi hans hægri hönd og plötusnúður.

„Þetta var algjörlega misheppnað grín hjá mér þar sem ég var að reyna að segja að viðkomandi væri fáviti með því að líkja honum við þá sem fara með botnlaust tjald til Vestmannaeyja,“ segir Patrik.

„En grínið var ömurlegt og í ljós kom að ég var eini fávitinn í þessum samtali. Ég vil að það komi skýrt fram að ég fordæmi allt kynferðisofbeldi.“

Fréttastofa hefur gert endurteknar tilraunir til að ná sambandi við Patrik undanfarna viku vegna ummælanna en án árangurs. Yfirlýsinguna í heild má sjá að neðan.

Fram undan eru stór verkefni hjá Patrik. Má þar nefna Menningarnæturtónleika Rásar 2 og Garðpartý Bylgjunnar á Menningarnótt.