Ákærður fyrir að fótbrjóta ökuníðing

Ríkissaksóknari hefur ákært lögreglumann fyrir líkamsmeiðingar af gáleysi og umferðarlagabrot. Meint brot áttu sér stað þegar lögreglumaðurinn veitti ökumanni eftirför úr Reykjavík í Mosfellsbæ.

Lögreglumaðurinn er rúmlega fimmtugur og starfar sem varðstjóri hjá lögreglunni á höfuðborgarsvæðinu. Ákæran á hendur honum var þingfest í Héraðsdómi Reykjavíkur í gær og neitaði hann sök.

Í ágúst í fyrra var hann undir stýri lögreglubíls og mældi ungan ökumann á of miklum hraða í Reykjavík. Hann gaf honum í kjölfarið merki um að stöðva bílinn en sá virti það að vettugi, ók greitt um götur borgarinnar og síðan áleiðis í Mosfellsbæ. Maðurinn ók að lokum inn í öngstræti í Leirvogstungu og neyddist til að stöðva bílinn. Hann stökk síðan út úr honum.

Lögregluvarðstjórinn kom aðvífandi á bíl sínum, tókst ekki að stöðva hann í tæka tíð og ók á unga manninn, sem hlaut opið beinbrot á vinstra fæti. Í ákæru er því haldið fram að varðstjórinn hafi ekið ógætilega að bílnum og of hratt miðað við aðstæður og þannig orðið valdur að slysinu. Ungi maðurinn fer fram á ríflega tvær og hálfa milljón króna í bætur frá lögreglumanninum.

Snorri Magnússon, formaður Landssambands lögreglumanna, segir í samtali við Fréttablaðið að þó að hann geti ekki tjáð sig um þetta einstaka mál að svo stöddu, þyki honum mál af þessum toga almennt orka tvímælis.

„Það er ansi napurlegt að lögreglumenn sem eru að vinna vinnuna sína eigi á hættu að vera gerðir persónulega ábyrgir í svona málum. Við veltum því fyrir okkur hver ábyrgð vinnuveitanda sé í þessum tilfellum.“ Snorri bætir því við að málarekstur hafi í för með sér mikil fjárútlát og komi illa við þá sem þurfa að standa í slíku. Því séu þessi vinnubrögð ámælisverð. - sh, þj