Myndir ársins 2012 - Stormasamt ár kveður

Veðurofsi, forsetakosningar, Landsdómur og stór hrunmál eru meðal atburða sem eru eftirminnilegastir á árinu 2012 eins og þetta safn gæðamynda ljósmyndara Fréttablaðsins og Vísis eru vitnisburður um. Kannski verður ársins 2012 helst minnst fyrir veðuröfgar, en á haustdögum gerði í tvígang veður sem hafði mikil áhrif um allt land. Mikill fjárskaði á Norðurlandi og veðurhæð syðra sem nálgaðist gömul met eru til vitnis um það. Þetta var árið sem Ólafur Ragnar Grímsson var kosinn til setu á Bessastöðum sitt fimmta kjörtímabil sem forseti Íslands. Eins kom Landsdómur saman í fyrsta skipti í lýðveldissögunni, og var málið eitthvert það umdeildasta í samtímasögu Íslands. Stór hrunmál komu til kasta dómstóla. Þessum átökum lands og þjóðar má finna stað í myndum sem ljósmyndarar Fréttablaðsins og Vísis völdu sem lýsandi vitnisburð fyrir árið sem er að kveðja. Nývígður biskup Íslands, Agnes Sigurðardóttir, og fráfarandi biskup, Karl Sigurbjörnsson, við vígslu þeirrar fyrrnefndu. Snjórinn gerði vart við sig á árinu. Þessir kappar stóðu í ströngu á bílastæði í Efra-Breiðholti þegar ljósmyndara bar að garði. Hreiðar Már Sigurðsson og Ólafur Ólafsson mættu fyrir rétt í Héraðsdómi Reykjavíkur í Al-Thani málinu í mars. Starfsmenn sérstaks saksóknara gerðu húsleit í skrifstofum Samherja í Reykjavík og á Akureyri og fluttu þaðan gögn til rannsóknar í mars. Geir H. Haarde var ómyrkur í máli þegar hann ávarpaði fréttamenn eftir dómsuppkvaðningu Landsdóms í Þjóðmenningarhúsinu í apríl. Veðurbarinn vegfarandi í vetrarveðri við Hringbraut. Frú Vigdís Finnbogadóttir óskar nývígðum biskupi Íslands, Agnesi Sigurðardóttur, til hamingju í anddyri Hallgrímskirkju. Vel fór á með Jóni Gnarr borgarstjóra og Clarke Peters, leikara úr sjónvarpsseríunni The Wire, í Höfða í september. Þeir voru meðal þeirra sem kynntu dagskrá ráðstefnunnar Spirit of Humanity Forum. Götulistamaður í Bankastræti í Reykjavík. Söngkonan Lady Gaga tók á móti friðarverðlaunum LennonOno úr hendi Yoko Ono við hátíðlega athöfn í Hörpu í haust. Verslunin Bauhaus var opnuð í maí. Starfsmenn unnu hörðum höndum við að setja upp hillur og raða vörum í þær vikurnar fyrir opnun enda er verslunin um 22 þúsund fermetrar að stærð. Hættulegt var að vera á ferli í óveðrinu í byrjun nóvember. Gangandi vegfarendur fuku um koll þar sem vindurinn var sterkastur. Wen Jiabao, forsætisráðherra Kína, var léttur á brún við komuna til Íslands í vor. Reykvíkingur ársins, Theodóra Rafnsdóttir, veiddi fyrsta lax ársins og sinn Maríulax í Elliðaánum í sumar. Jón Gnarr borgarstjóri kíkir hér á aflann. Theodóra hefur starfað í þágu unglinga með skerta starfsgetu og að skógrækt á Breiðholtssvæðinu. Félagið Ísland-Palestína stóð fyrir mótmælum fyrir framan sendiráð Bandaríkjanna við Laufásveg í nóvember. Félagið sagði tilefnið vera grimmilegar árásir Ísraelshers og fjöldamorð þeirra á palestínskum borgurum á Gaza-ströndinni. Dómsmál Annþórs Kristjáns Karlssonar og Barkar Birgissonar vakti mikla athygli. Annþór var dæmdur í Héraðsdómi Reykjaness í sjö ára fangelsi og Börkur Birgisson í sex ára fangelsi fyrir alvarlegar líkamsárásir. Smávægileg átök áttu sér stað á milli stríðandi fylkinga á mótmælum sjómanna og útvegsmanna á Austurvelli í sumar. Ný brú var lögð niður Kárastaðastíg í Almannagjá á Þingvöllum eftir að mikil sprunga kom í ljós á miðjum stígnum í fyrra. Pussy Riot-mótmæli við sendiráð Rússlands við Garðastræti í Reykjavík. Sprenging í ofanleiti Öflug sprenging varð í íbúð við Ofanleiti 15. september. Maður sem í íbúðinni var lést af sárum sínum. Eftir ítarlega rannsókn var sprengingin rakin til gasleka í íbúðinni, en hún var svo öflug að hús í nágrenninu skulfu. Gríðarlegar skemmdir urðu á húsnæðinu og rúður brotnuðu í nærliggjandi húsum og bílum. Listamaðurinn Santiago Sierra stóð fyrir gjörningi í aðdraganda sýningar sinnar í Hafnarhúsi í byrjun árs. Listaverkið NO er stór skúlptúr sem ferðast hefur um heiminn síðan 2009. Nei-ið er sameiningartákn alþýðu á tímum mikillar óánægju með ríkjandi auðvaldsstefnu og kreppu sem ekki sér fyrir endann á. Listaverk Magnúsar Tómassonar, Óþekkti embættismaðurinn, var fært á nýjan stað og stendur nú á Tjarnarbakkanum við Iðnó. Mikið óveður gekk yfir Norðurland 10. og 11. september með fannfergi og viðvarandi rafmagnsleysi dögum saman. Fé var enn á fjalli þegar veðrið skall á og fennti það í kaf í þúsunda vís. Mörg hundruð björgunarsveitarmenn leituðu á stóru svæði dagana á eftir en neyðarástandi var lýst yfir á Norðurlandi. Vikurnar á eftir hélt leit áfram en skaðinn var skeður; mörg þúsund kindur höfðu drepist en það vakti athygli að einstaka kind fannst lifandi, grafin í fönn, langt fram eftir októbermánuði. Ameríska sjónvarpsstjarnan Ryan Seacrest var hress að vanda á Ólympíuleikunum í London og stillti sér upp í myndatöku með aðdáendum sínum. Guðgeir Guðmundsson var úrskurðaður í gæsluvarðhald eftir að hafa ráðist inn á Lögmannsstofuna Lagastoð og veitt framkvæmdastjóra stofunnar lífshættulega áverka. Magnað þríeyki; Jón Gnarr, Yoko Ono og Lady Gaga í Hörpu í október. Svanhildur Hólm Valsdóttir, þá framkvæmdastjóri þingsflokks sjálfstæðismanna, faðmar Geir H. Haarde fyrir dómsuppkvaðningu Landsdóms í apríl. Bræðurnir Bjarni og Jóhannes Karl Guðjónssynir gáfu ekkert eftir fyrir leik liða sinna, KR og ÍA, í Pepsi-deild karla í maí. Þetta var í fyrsta sinn sem bræðurnir mættust í opinberum leik. Hafnfirðingurinn Karl Ágúst Arnarsson, þrettán ára, lék sér að því að stökkva í Hafnarfjarðarhöfn úr sex metra hæð í sumarblíðunni. Ferðalangar undruðust þegar þeir gengu fram á krossfestan mann á Arnarhóli á föstudaginn langa. Nemendur Menntaskólans í Reykjavík voru ófrýnilegir þegar þeir tóku á móti nýnemum í árlegri busavígslu. Geir H. Haarde í Landsdómi. Hljómsveitin Of Monsters and Men sló í gegn út um allan heim og átti ævintýralegu gengi að fagna á árinu. Lárus Welding, fyrrverandi forstjóri Glitnis, og Bjarni Benediktsson, formaður Sjálfstæðisflokksins, mættu í Héraðsdóm Reykjavíkur þegar Vafningsmálið var tekið fyrir. Slökkviliðsmenn að störfum við eldsvoða í Bláa turninum við Háaleitisbraut. Ný vindmylla Landsvirkunnar var reist við Búrfellsvirkjun í byrjun vetrar. Breski tónlistarmaðurinn Kwes var meðal þeirra fjölmörgu listamanna sem komu fram á tónlistarhátíðinni Iceland Airwaves. Hann hélt tónleika í Hafnarhúsinu við góðar undirtektir. Nýja vindmyllan við Búrfellsvirkjun er vígaleg. Hæð mastursins er 55 metrar og hver spaði er 22 metrar að lengd. Gestir flykktust til landsins á Iceland Airwaves-tónlistarhátíðina sem fram fór í Reykjavík í byrjun nóvember og heppnaðist vel. Ari Trausti Guðmundsson forsetaframbjóðandi gekk út úr beinni útsendingu frá kappræðum forsetaframbjóðenda í Hörpu. Jóhanna Sigurðardóttir forsætisráðherra tók á móti Wen Jiabao, forsætisráðherra Kína, við komu hans í Keflavík í vor. Hætta skapaðist við Höfðatorg í Reykjavík í óveðrinu í nóvember og þurftu vegfarendur að hafa sig alla við til að komast leiðar sinnar. Forseti Íslands, Ólafur Ragnar Grímsson, var settur í embætti 1. ágúst í fimmta sinn við hátíðlega athöfn í Alþingishúsinu. Þar með hófst fimmta kjörtímabil hans en hann er fyrsti forseti lýðveldisins sem hefur setið lengur en í fjögur kjörtímabil. Forsetakosningarnar fóru fram 30. júní og hlaut forsetinn rúm 52% greiddra atkvæða. Þrír karlar og þrjár konur buðu sig fram til embættisins, fleiri en áður hefur þekkst og var kosningabaráttan á tímum óvægin. Sprengja sprakk fyrir aftan Stjórnaráð Íslands að morgni dags í lok janúar. Í kjölfarið var lögregla og sérsveit ríkislögreglustjóra ásamt sprengjusveit Landhelgisgæslunnar kölluð til. Fannst þá torkennilegur hlutur í kassa á svæðinu. Hættan reyndist lítil að lokum. Þyrla Landhelgisgæslunnar, TF-GNÁ, fór á vettvang þegar banaslys varð í Helgafelli í janúar. Brimið bar við Hörpu þegar það gekk yfir Norðurgarð Reykjavíkurhafnar með látum og miklu sjónarspili í óveðrinu í nóvember.