Veiðin 2012: Aðeins 12 af 38 laxveiðiám með 100 laxa á stöng

Trausti Hafliðason skrifar 10. nóvember 2012 18:52

Hér geta áhugasamir flett í gegnum átta gröf sem sýna heildarveiðina frá 2005 og veiðina á hverja stöng síðasta sumar.

Aðeins 12 af 38 ám sem Veiðivísir tók saman tölur um skiluðu 100 löxum eða meira á hverja stöng síðasta sumar. Hlutfallslega voru því 32 prósent laxveiðiáa með 100 laxa á stöng. Í fyrra var þetta hlutfall 71 prósent en þá skiluðu 27 af 38 laxveiðiám 100 löxum eða meira á stöng. Gröf með upplýsingum um heildarveiði síðan árið 2005 og veiði á stöng er að finna hér til hliðar og er ám þar skipt eftir landshlutum.

Þessar tölur koma veiðimönnum vafalaust lítið á óvart enda veiðisumarið það lélegasta í manna minnum. Kunnugir segja að fara þurfi allt aftur til ársins 1930 til að finna lélegri veiðitölur.

Það vekur sérstaka athygli að besta veiðin á stöng var í Haffjarðará (191 lax) og Selá í Vopnafirði (188). Báðar þessar ár trónuðu einnig á toppnum í fyrra. Þá skilaði Haffjarðará 254 löxum á stöng og Selá 253.

Það segir sínar sögu um laxveiðisumarið í heild að þrátt fyrir að veiðin í þessum aflahæstu ám landsins sé ríflega 25 prósent lakari en í fyrra þá verma þær samt sem áður toppsætið aftur.

Auk Haffjarðarár og Selár voru fjórar aðrar ár með meira en 150 laxa á stöng. Ytri-Rangá skilaði 187 löxum (207 í fyrra), Elliðaárnar 166 (230 í fyrra), Eystri-Rangá 164 (244 í fyrra) og Miðfjarðará 161 (236 í fyrra).

Átta laxveiðiár með minna en 50 laxa á stöng

Við veiðar í Laxá í Aðaldal.Mynd / Trausti Hafliðason

Sumarið 2011 var einungis ein á á þessum lista sem var með minni veiði en 50 laxa á stöng en það var Hvannadalsá á Vestfjörðum. Nú hefur heldur fjölgað í þessum hópi en alls voru átta laxveiðiár með lélegri veiði en 50 laxa á stöng síðasta sumar.

Það er engin smá laxveiðiá sem vermir botninn. Áin hefur reyndar aldrei verið þekkt fyrir fjölda laxa á stöng heldur miklu fremur stórlaxana sem í henni leynast. Laxá í Aðaldal situr sem sagt á botninum með 24 laxa á stöng en í fyrra var hún með 59.

Næst á eftir Laxá í Aðaldal kemur Hvannadalsá sem skilaði 25 löxum (33 í fyrra), Fnjóská 33 (86 í fyrra), Svartá í Svartárdal 37 (75 í fyrra), Laugardalsá 40 (61 í fyrra), Víðidalsá 41 (93 í fyrra), Vatnsdalsá 47 (106 í fyrra) og Gljúfurá í Borgarfirði 47 (89 í fyrra).

trausti@frettabladid.is