Garcia nýtur augnabliksins

Spánverjinn Sergio Garcia og Ástralinn Marc Leishman eru efstir og jafnir að loknum fyrsta keppnisdegi á Masters mótinu í golfi.

Garcia spilaði gallalaust golf í gær og tapaði ekki holu á hringnum. Hann fékk sex fugla, fjóra á fyrri níu og tvo á þeim síðari. Spánverjinn sem hefur aldrei sigrað á risamóti þrátt fyrir að hafa tekið þátt í 54 slíkum er til alls líklegur.

„Þetta er auðvitað ekki uppáhaldsvöllurinn minn," sagði Garcia á blaðamannafundi í nótt. „Þetta var einn af þessum góðu dögum. Við skulum njóta þess á meðan varir."

Aðspurður hvort hann meinti að honum fyndist engin press vera á sér og hann ætlaði bara að njóta þess að spila sagði Spánverjinn:

„Í hvert skipti sem ég hef leik á móti er markmiðið að spila eins vel og ég get og eiga möguleika á sigri," sagði Garcia. Það sama sé uppi á teningnum á Masters.

„Þetta var ánægjulegur dagur og vonandi verða næstu þrír af sama toga. Við skulum sjá til hvað gerist á sunnudagskvöldið."

Leishman lét skolla á fyrstu holu ekki slá sig útaf laginu. Hann nældi í tvo fugla á fyrri níu og fimm á þeim síðari. Ástralinn 29 ára er þó ekki talinn líklegur til afreka en þetta er aðeins í annað skiptið sem hann keppir á Masters.

Dustin Johnson byrjaði hringinn á flugi og var kominn tvo undir par eftir tvær holur. Hann bætti tveimur fuglum í safnið og fékk svo örn á 13. holu vallarins sem er par 5.

Bandaríkjamaðurinn lauk keppni á fimm höggum undir pari þökk sé skolla á 17. holunni.

David Lynn, Rickie Fowler, Gonzalo Fernandez-Castano, Trevor Immelman, gamla brýnið Fred Couples og Matt Kuchar deila svo fjórða sætinu á fjórum undir pari.

Tiger Woods fékk þrjá fugla og einn skolla á hringnum. Hann er á tveimur undir pari samanlagt í 13. sæti.

Staðan í mótinu.

Bein útsending frá öðrum keppnisdegi á Masters hefst á Stöð 2 Sport & HD klukkan 19 í kvöld.