EVE spilari tapaði skipi sem var metið á meira en milljón

Það er leiðinlegt að tapa í tölvuleik, en það er enn leiðinlegra þegar þú ert svikinn af vini þínum og tapar rúmri milljón fyrir vikið.

Þetta kom fyrir eiganda Revenant Super Carrier skipsins í EVE Online, en það er eitt sjaldgæfasta skipið í leiknum. Það er orðið vel þekkt að hlutir í leiknum ganga kaupum og sölum fyrir pening í raunheimum, en þetta tiltekna skip er hinsvegar metið á 8-9.000 bandaríkjadali, jafnvirði meira en milljón íslenskra króna.

Skip af þessu tagi hefur aldrei verið eyðilagt í leiknum og það hefði ef til vill ekki gerst nema vegna þess að vinur eigandans og meðspilari leiddi hann í gildru óvinaliðs með fyrrgreindum afleiðingum.

Hér fyrir neðan má sjá myndband af atvikinu. Þar sjást tugir, ef ekki hundruð, skipa í liði svikarans. Þau láta sprengjur og leysigeisla dynja á hinu risastóra skipi þar til það springur. Þar með varð eigandi skipsins af andvirði þess.

Nánar er fjallað um málið á Forbes.