Segir NATO ekkert erindi eiga til Sýrlands

Guðjón Heiðar Valgarðsson frá vefmiðlinum Gagnauga.is ræddi við Harmageddon um ástandið í Sýrlandi í morgun. 

Allt virðist stefna í hernaðaraðgerðir Bandaríkjamanna í landinu, að minnsta kosti í einhverri mynd en margir eru efins um heillindi Bandaríkjanna í málinu. Guðjón Heiðar er einn af þeim.

Guðjón Heiðar segist viss um að efnavopnárásir á borgara Sýrlands séu og hafi aldrei verið framkvæmdar af stjórn Assads Sýrlands forseta, heldur séu þær verk uppreisnarmanna eða annarra afla sem eru styrkt af Jórdaníu, Saudi Arabíu, Ísrael og Bandaríkjunum sem vilji villa um fyrir almenningi og skella skuldinni á Sýrland.



Gefum okkur það að raunverulegar sannanir kæmu fram um að Sýrlenski stjórnarherinn hefði beitt efnavopnum á sína eigin borgara, hver yrði þá afstaða þín til loftárása á Sýrland?



„Þessi spurning meikar ekki neitt sens, það eru ekki að fara að koma neinar sannanir fyrir þessu vegna þess að það eru engar líkur í heiminum á því að Assad hafi gert þessar árásir,“ sagði Guðjón Heiðar.



Varðandi hernaðarafskipti NATO í Bosníu á tíunda áratugnum, þar sem Serbar voru loksins stöðvaðir eftir að hafa stundað þjóðernishreinsanir, hópmorð og nauðganir á Kosovo-Albönum í langan tíma án nokkurra afskipta frá alþjóðasamfélaginu segir Guðjón Heiðar:



„Ég hef farið til Serbíu og ég veit það að þeir eru brjálaðir út í Bandaríkin og NATO fyrir þetta og líta þetta ekki næstum því sömu augum og fólk á Vesturlöndum heldur. Góður félagi minn frá Serbíu útskýrði mjög náið fyrir mér hvernig þetta var, og ég hef horft á heimildarmyndir um þetta eftir að ég var þarna. Þarna var mjög svipað upp á teningnum þar sem var verið að fjármagna andspyrnuhópa, láta þá fremja voðaverk til að klína því á stjórnarhópa sem þeir vildu koma höggi á,“ sagði Guðjón Heiðar sem bætti því við að þetta hefði verið sama formúlan og sama uppskriftin þar eins og hafði verið í Lybíu og núna væri verið að fara eftir í Sýrlandi.



Hægt er að hlusta á allt viðtalið hér að ofan.