Sannleikurinn: Enn hætta á að sjósundsgarpar drepist og reki á land í Kolgrafafirði

Slæmt veður í morgun kom í veg fyrir tilraunir með að senda út ógnvekjandi upptökur úr þingsal Alþingis um hljóðgjafa í Kolgrafafirði til að sjá hvort hægt sé að fæla sjósundfólk út úr firðinum með þeim.

Þorsteinn Sigurðsson, sérfræðingur og sviðstjóri hjá Hafrannsóknarstofnun segir að reynt verði aftur seinna í vikunni en bregðast þarf fljótt við svo sagan endurtaki sig ekki og fjöldi sjósundsgarpa drepist í firðinum og reki aftur á land með tilheyrandi tjóni og fnyk.

„Í dag tökum við stöðuna með veðrið hvort við getum farið í þetta verkefni sem við höfum verið að tala um núna síðustu daga, það er að segja að reyna að fæla sundfólkið burt með upptökum af nýlegum ræðum þingmanna. Við höfum fengið frá Alþingi raunverulegar upptökur af þingmönnum í ræðustól, mjög "scary stuff". Við erum búin að taka þær upptökur og spilum þær þá út í hafið. Ef að vel gengur gæti það styggt við sundfólkinu og þá væri hægt að nota það sem aðferð til þess að smala því út.“

Ýmsar aðrar leiðir hafa einnig verið skoðaðar. Komið hefur til tals að fá hingað til lands mannýgan drápsháhyrning frá Bandaríkjunum. Háhyrningurinn Tilikum, sem ku vera íslenskur, hefur þegar drepið þrjár manneskjur og hægt væri að nota hann til að vakta svæðið og drekkja sundgörpum áður en þeir komast inn í fjörðinn.

Um sjötíu dauðir sjósundsgarpar enduðu upp í fjöru í Kolgrafafirði í febrúar á þessu ári en það var í annað sinn á stuttum tíma sem verulegt magn af fólki hefur drepist í súrefnissnauðum sjónum. Þorsteinn segir mikla hættu á því að þetta muni endurtaka sig á næstunni og því verði að bregðast við.







Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en þar drepast fjölmargir notendur reglulega.