Sakfelldir fyrir hrottalega nauðgun

Fjórir menn voru í morgun sakfelldir af dómstól í Nýju-Delí fyrir hópnauðgun í desember síðastliðnum, sem leiddi til dauða ungrar konu.

Dómari hyggst í dag skýra frá því, hvaða refsingu mennirnir fá. Þeir eiga yfir höfði sér dauðarefsingu og hefur fjöldi fólks komið saman á götum úti til að krefjast þess að þeir verði hengdir.

Nauðgunin í desember vakti mikla reiði á Indlandi og benti margt til þess að vitundarvakning væri að eiga sér stað þar, en til þessa hefur kynferðisofbeldi almennt verið látið afskipta- og refsilítið þar í landi.