Uppbótartíminn: Erfitt hjá Sigga Ragga í Eyjum

Þriðja umferð Pepsi-deildar karla í knattspyrnu kláraðist í gær. Hverjir áttu góðan dag og hverjir áttu erfiðan dag? Hvað segir tölfræðin og dómstóll götunnar? Vísir gerir hér upp umferðina á léttum nótum.

Keflvíkingar eru á toppi deildarinnar og eina liðið með fullt hús stig eftir þrjá sigra í þremur fyrstu leikjunum. Erfiðlega gengur hjá Þórsurum sem hafa tapað þremur fyrstu leikjum sínum og þá eru Blikar aðeins með eitt stig.

Umfjöllun og viðtöl úr öllum sex leikjum umferðarinnar:

KR - FH 0-1

Stjarnan - Víkingur 0-0

Fram - Þór 1-0

ÍBV - Fylkir 1-3

Fjölnir - Valur 1-1

Keflavík - Breiðablik 2-0

Góð umferð fyrir ...

... Elías Már Ómarsson, Keflavík

Framherjinn bráðefnilegi skoraði bæði mörkin í sigri Keflavíkur gegn Breiðabliki. Seinna markið var einstaklega flott en hann stakk þá Damir Muminovic, miðvörð Breiðabliks, af og skoraði framhjá Gunnleifi. Elías skoraði tvö mörk í deildinni í fyrra í 16 leikjum og er nú kominn með tvö í tveimur.

... Heimi Guðjónsson, þjálfara FH

Heimi tókst loks að vinna KR aftur í deildinni og hafði betur gegn góðvini sínum úr '69-árgangi KR, Rúnari Kristinssyni. KR var fyrir leikinn í gærkvöldi búið að vinna fjóra leiki í röð gegn FH í deildinni. Vel uppsettur leikur hjá Heimi sem vann sanngjarnan sigur með FH-liðið.

... Jóhannes Karl Guðjónsson, Fram

Framarar unnu sinn fyrsta sigur í deildinni með marki úr vítaspyrnu frá Jóa Kalla. Jóhannes átti fínan leik en gerði það sem skipti máli og skoraði úr vítaspyrnunni. Það var létt yfir Safamýrarpiltum í leikslok enda þurgu fargi af mönnum létt.

Erfið umferð fyrir ...

... Gunnleif Gunnleifsson, Breiðabliki

Markvörðurinn öflugi varði flest þau skot sem komu á rammann en hann fékk litla hjálp frá samherjum sínum í mörkunum sem Keflavík skoraði. Fyrst þurfti hann að verja marktilraun samherja síns, Elfars Freys Helgasonar, í fyrra markinu og svo mætti hann Elíasi Má, maður á móti manni, eftir að sá síðarnefndi stakk varnarlínu Breiðabliks af.

... Sigurð Ragnar Eyjólfsson, þjálfara ÍBV

Eitt stig eftir þrjár umferðir og tvö töp í tveimur heimaleikjum í röð. Siggi Raggi gat varið tapið gegn Stjörnunni þar sem liðið brenndi af dauðafærum, m.a. vítaspyrnu, og fékk á sig klaufaleg mörk. Frammistaðan í gær var þó einfaldlega ekki nógu góð. Vestmannaeyingar eru ekki vanir því að tapa á heimavelli, hvað þá tvisvar í röð.

... Vallargesti í Garðabæ

Lögreglan á höfuðborgarsvæðinu varaði vallargesti við því í gær að hún yrði á vaktinni og myndi sekta þá sem legðu ólöglega. Vallargestir á Samsung-vellinum fóru illa út úr rassíu lögreglunnar sem skilaði miklum nettó-hagnaði eftir gærkvöldið.

Tölfræðin:

*Átta af tíu nýliðum sem hafa náð í sjö stig eða meira út fyrstu þremur umferðunum (frá því að 3ja stiga reglan var tekin upp 1984) hafa haldið sæti sínu í deildinni um haustið og sjö þeirra hafa endað í efri hluta deildarinnar.

*Blikar fengu síðast bara eitt stig í fyrstu þremur umferðunum sumarið 1996 en þeir féllu þá úr deildinni um haustið. Breiðabliksliðið hefur ekki byrjað verr í 22 ár eða síðan liðið tapaði þremur fyrstu leikjum sínum vorið 1992.

*Keflavík vann aðeins einn af fyrstu fimm leikjum sínum eftir að Kristján Guðmundsson tók við liðinu á miðju síðasta sumri en hefur síðan unnið átta af þrettán leikjum sínum í Pepsi-deildinni og náð í stig í öllum leikjum nema þremur.

Skemmtilegir punktar úr boltavaktinni:

Kristinn Páll Teitsson á Samsung-vellinum:

„Hér fyrir framan blaðamannastúkuna er stuðningsmaður Stjörnunnar með merkt Snapchat #10 á bakinu. Tölvukynslóðin."

Henry Birgir Gunnarsson í Dalnum:

„Sýnist á öllu að heljarinnar undirbuxnaskandall sé í gangi. Útsýnið er kannski ekki það besta en sé ekki betur en bæði Davið Þór og Jón Ragnar séu í svörtum undirbuxum. Það varð allt vitlaust út af því í fyrra og þá þurfti Freysi Bjarna að yfirgefa völlinn. Hvað gerir baróninn núna?“    

Guðmundur Tómas Sigfússon í Eyjum:

„Dómarar leiksins gerðu athugasemd við stærð eða lengd miðjuboga og lengd frá vítapunkti og að vítateigsboga. Lengdin er sú sama og í seinasta leik en þá var Gunnar Jarl Jónsson með völdin en nú er það Kristinn Jakobsson. Misjafn er smekkur dómaranna.“

Hæstu og lægstu einkunnir umferðarinnar:

Kassim Doumbia, FH - 8

Andrew Sousa, Fylki - 8

Elías Már Ómarsson, Keflavík - 8

Almarr Ormarsson, KR - 2

Ivar Furu, KR - 3

Ingimundur Níels Óskarsson, FH - 3

Albert Brynjar Ingason, FH - 3

Þórður Birgisson, Þór - 3

Ragnar Leósson, Fjölni - 3

Dómstóll götunnar:

Fram vann Þór með marki úr vítaspyrnu sem dæmd var á Orra Frey Hjaltalín þegar hann braut á Ósvald Jarl Traustasyni innan teigs en ekki voru allir sammála um að Ívar Orri Kristjánsson, dómari leiksins, hafi gert rétt með að flauta.

„Það var dæmt víti öðrum megin, en ekki hinum megin,“ sagði Páll Viðar Gíslason, þjálfari Þórs, við blaðamann Vísis á vellinum eftir leik en hann vildi einnig fá vítaspyrnu.

Víti segi ég

— Elvar Geir Magnússon (@elvargeir) May 12, 2014

Aldrei víti sem Framararnir fengu í Dalnum í kvöld. Þeir þurftu svo sannarlega á þessu að halda. Aumingja Þór. #pepsi365

— Kolbeinn Tumi (@kolbeinntumi) May 12, 2014

Mér persónulega fannst þetta eiginlega bara pjúra víti... af hverju er hann að sparka í kálfann á honum?

— Jóhann Skúli Jónsson (@joiskuli10) May 12, 2014

Af hverju er Þórsarinn að sparka í Framarann? Býður uppá víti

— Einar Gudnason (@EinarGudna) May 12, 2014

Öll mörkin úr 3. umferðinni: