Ásgeir vann mót í Hollandi

Ásgeir Sigurgeirsson fagnaði í gær sigri í keppni í loftskammbyssu á Inter Shoot, sterku móti í Hollandi.

Ásgeir hlaut flest stig í undankeppninni, 582 talsins, og tryggði sér svo sigur með því að fá 197,2 stig í úrslitunum. Adrian Syms frá Englandi kom næstur með 195,0 stig.

Þetta er í annað sinn sem Ásgeir fagnar sigri á mótinu en næst á dagskrá hjá honum eru æfingar með ítalska landsliðinu í skotfimi. Ítalía er ríkjandi heimsmeistari í loftbyssu og Evrópumeistari í fríbyssu.