Skipið, sem er um fimm þúsund tonn að þyngd og með sautján áhafnarmeðlimi, var á leið inn fjörðinn að sækja afurðir. Í tilkynningu frá Landsbjörg segir að á meðan beðið hafi verið eftir hafnsögumanni hafi komið upp vélarbilun með þeim afleiðingum að skipið hafi bakkað upp í fjöru.
Skipið er stöðugt á strandstað og ekki hefur orðið vart við leka inn í skipið né olíuleka úr því. Þá er skipið talið lítið skemmt.
Þá var taug komið á milli skipsins og Vilhelms Þorsteinssonar, fjölveiðiskips Samherja. Von er á þyrlu Landhelgisgæslunnar á vettvang um ellefuleytið. Veður á svæðinu er gott.
Akrafellið strandaði skammt frá þann 6. september.
Uppfært 23:50
Björgunarsveitarmenn hafa nú yfirgefið strandstaðinn og Vilhelm Þorsteinsson, skip Samherja, sem var með fragtskipið í togi er einnig farið. Ljóst er að ekki verður reynt að ná skipinu af strandstað fyrr en í fyrramálið, losni það ekki af sjálfsdáðum. Bæði skrúfa og stýri skipsins hafa orðið fyrir skemmdum.
Útlit er fyrir að kostnaður við björgun skipsins valdi því að það verði ekki reynt í kvöld.
