Sykurskert sæla Siggu Daggar

Fyrsta helgin í sykurleysi

Það er líkt og með sykurleysi mínu sé ég að pota í aðra og segja að þeir séu að gera eitthvað rangt eða slæmt. Átakið fær háð og spott en ekki klapp á öxl og stuðning. Ótrúlegt að sykur skuli vera svona umdeildur. Greinilegt að hér er á ferðinni mikilvægt málefni og ég skal halda áfram.

Það var ekkert svo flókið að sneiða hjá nammi en ég gleymdi mér aðeins þegar ég henti í amerískar pönnukökur og drekkti þeim í hlynsírópi. Ofan í kaffið dýfði ég svo kexi og kleinum. Ansans. Ég náði rétt svo að skauta framhjá kókómjólkinni en leyfði mér rauðvínsglögg og bjór. Slíkur sykur var munaður minn er ég dillaði mér við Amadabama.

Heilt yfir gekk helgin bara vel. Maðurinn minn sem er minn stærsti stuðningsaðili í lífinu reynist vera minn helsti óvinur í þessu átaki. Það líður varla sú klukkustund án þess að hann bjóði mér candyfloss, sterkan brjóstsykur, gos, ís eða köku. Það er greinilegt að átakið potar í almenna neyslu heimilisins á hinu dísæta.

Allt í lagi, ég játa að ég fékk mér eina ofurfallega kökusneið í barnafmæli á sunnudeginum en ég lét staðar numið við eina sneið (þó ég hefði auðveldlega geta étið hálfa kökuna ef því væri að skipta).

Mánudagur 8.september - Næstum því vika af átakinu!

Sykurskertur september er skemmtileg hugaræfing. Ég ímynda mér að þetta sé svipað eins og að reikna algebru. Smá matarmeðvitund en alls engin bilun. Ég er ekki frá því að maginn minn sé ekki jafn kúlulaga. Það getur samt stafað af því að ég borða bara minna því ég er ekki að narta í sykur. Ætli ég sé kannski bara svöng og þarf að venja mig á að borða mat sem er venjulegur matur en ekki glassúrshúðaður? Nú er bara að henda í heimagerða bbq sósu þar sem sætan kemur frá döðlum (og reyndar líka smá frá soja sósunni).

Þriðjudagur 9.september

Ég sakna sultu, ég neita því ekki. Ég var nýbúin að henda í ljúffenga heimagerða rabbabaraogjarðaberja sultu sem bara horfir fallegum augum til mín er ég smyr ristað brauðið með smjöri og osti. Ég hugsa að átaki liðnu að ég leyfi mér sultu um helgar, það hljómar raunhæft og elegant.

Það er mjög huggandi að vita að enginn mánuður byrji á bókstafinum -H. Þá þarf ég ekki að hafa neinar áhyggjur af hveiti átaki, því þá væri ég vissulega föst í fósturstellingunni uppi í rúmi með hungurverki. Þá vona ég að enginn taki heldur upp á Mjólkurlausum Maí því þá verður mér allri lokið. Þetta sykur dæmi sleppur en hitt, ekki sjens.

Miðvikudagur 9.september

Rikka kom færandi hendi með risastóran poka af allskyns sniðugum sykri, svona hollustusykri svo hvað var annað hægt en að baka? Dóttir mín gladdist ákaflega mikið þegar ég tilkynnti henni að við ætluðum að baka sítrónukleinuhringi. Þetta er einn auðveldasti og fljótlegasti síðdegisglaðningurinn sem ég geri. Ég skal alveg játa að ég gæti hafa fengið mér aðeins of marga kleinuhringi (það að baka þá pínkulitla er villandi!). Ég bæði minnkaði sykurmagnið í uppskriftinni úr 300 gr í 200 gr, skipti út hvítum sykri fyrir brúnan heilsusykur, notaði heilhveiti í stað hvítu hveiti og vínsteinslyftiduft í stað hefðbundins lyftidufts.

Fjölskyldan lá í þeim og enginn kvartaði undan „hollustunni“. En til að tryggja að við myndum ekki breytast í kleinuhringi þá buðum við vinafólki okkar í kaffi og enginn kvartaði þar heldur. Þetta sýnir mér bara að það er hægt að breyta en samt baka, maður þarf bara að taka skrefið og nenna því.

Sítrónukleinuhringir SigguDaggar

1 egg

1 bolli og 1/4 bolli mjólk

30 gr bráðið smjör

256 gr heilhveiti

200 gr heilsusykur (ég nota oftast púðursykur í bland við einhvern annan sykur)

2 tsk vínsteinslyftiduft

rifinn börkur utan af 1 til 2 sítrónum (eftir hversu mikið bragð þú vilt)

1/2 tsk salt

2 tsk vanilludropar

Ath. Þú getur skipt út sítrónuberki fyrir 1 tsk af kanil og þá getur verið gott að setja kókossykur, kókosmjólk eða kókoshveiti með í deigið. Það má reyndar leika sér endalaust með þessa uppskrift, næst ætla ég að gera með appelsínuberki og súkkulaðibitum.

Aðferð:

1. Bræddu smjörið og hrærðu létt saman við egg og mjólk.

2. Settu sykurinn útí og hrærðu létt.

3. Því næst öll þurrefnin og vanilludropa undir lokin.

4. Bakaðu við 180 gráður í 15 mínútur ef kleinuhringjaformið er stórt, 8 mín ef þau eru lítil.

Þú getur svo gert hefðbundin glassúr úr flórsykri og vatni ef þú vilt.

Fimmtudagur 9.september

Dagur útgáfuteitis bókarinnar minnar, Kjaftað um kynlíf, er runnin upp! Ég ætla virða sykurminni september loforðið sem ég gaf sjálfri mér en þó leyfa mér að drekka nokkra dropa af rauðvíni, bara svona til að skála með gestum og gangandi. Og kannski fá mér Creme Brullée í desert, því það er svona sparidagur.

Ég reyndi að byrja daginn á að troða mér þröngar gallabuxur en það var of mikil bjartsýni. Í stað þess að reyna grenna mig ofan í þær ætla ég bara að kaupa mér nýjar. Ég las hvort eð er að þröngar gallabuxur væru ekki lengur í tísku. Þá hef ég vanist flatkökum á kaffihúsum bæjarins en kannski ættu þeir að prófa að gera kleinuhringina mína?