Endaði í jólasveinabúningi í síðustu hjólaferð

Ein þeirra sem setti sér markmið í Meistaramánuði er Sólveig Eiríksdóttir, eða Solla í Gló, en hún ætlar að hjóla meira.

„Ég ætla að fara út að hjóla á hverjum einasta degi,“ segir Solla, en það er töluvert langt síðan hún hjólaði síðast.

„Ég held að það hafi verið árið 1984, það eru því komin þrjátíu ár síðan. Þá var ég að kenna handavinnu uppí í Fellaskóla og hjólaði í vinnuna einu sinni. Ég varð rennblaut þegar ég kom á áfangastað en var ekki með föt til skiptana. Ég fann þó gamlan jólasveinabúning inni í skáp og endaði á að kenna handavinnutímann í honum.“

Já markmiðið er skýrt, einn hjólatúr á hverjum degi í október.

„Já það er mismikið. Ef veðrið er alveg glatað þá tek ég kannski bara nokkra hringi hér í portinu,“ segir Solla.

Auk þess að vera nú búin að opinbera markmið sitt í sjónvarpi ætlar Solla að leita stuðnings hjá vinkonum sínum til að halda sér við efnið.

„Ég er búin að tala við þrjár vinkonur mínar sem eru allar alveg brjálaðar hjólreiðakonur. Þær ætla að passa uppá að ég standi við markmiðin mín,“ segor Solla

En Solla verður sannarlega ekki eini hjólreiðamaðurin á götum borgarinnar en hjólreiðar eru lífstíll eða íþróttagrein sem á sífellt meira fylgi að fagna..

„Ég held að það sé bara vakning í gangi og þá sérstaklega hjá kvenþjóðinni sem hjólar í auknu mæli,“ segir Emil Guðmundsson, hjólreiðamaður.

En lumar Emil ekki á góðum ráðum fyrir nýja og verðandi hjólreiðamenn?

„Flestir eiga hjól svo ég myndi ráðleggja fólki að láta pumpa í dekkinn til að byrja með. Ég sé allt of marga hjóla um á loftlausum dekkjum,“ segir Emil og bætir við að það sé lítið mál að hjóla á veturna, það þurfi bara að búa sig betur. Emil segir það jafnframt lítið mál að komast hvert á land sem er á hjólinu.

„Það er minnsta málið. Ég er fljótari á hjólinu í vinnuna en á bílnum,“ segir Emil.