"Var þunnur í fimm ár“

Julian Casablancas, sem er þekktastur fyrir að vera söngvari The Strokes, hefur nú sagt að hann hafi verið þunnur í fimm ár sökum áfengisdrykkju. En söngvarinn, sem var að senda frá sér plötu ásamt hljómsveit sinni The Voidz,  var í viðtali við Rolling Stone tímaritið og ræddi þar hversu mikið líf hans breyttist eftir að hann hætti að drekka. Sagði Casablancas að þegar að hann var hvað verstur byrjaði hann daginn á því að fá sér vodka. Sagðist hann örugglega hafa virkað sjálfsöruggur og skemmtilegur en raunin hafi verið að hann þorði ekki að tala við fólk nema undir áhrifum áfengis. Þá bætti Casablancas við að það hefði tekið hann langan tíma að jafna sig og í tæp fimm ár hafi honum liðið eins og hann væri þunnur.

Hljómsveitin Mumford and Sons er í hljóðveri þessa dagana ásamt upptökustjóranum James Ford en hann hefur m.a. áður unnið með Arctic Monkeys. Hljómsveitin gaf síðast út plötuna Babel árið 2012 og fóru þeir í langt tónleikaferðalag til að kynna plötuna og sagðist sveitin ætla að taka sér smá hlé í kjölfarið. Ekki er þó ljóst hvort að upptökurnar séu staðfesting á því að hljómsveitin sé að vinna að nýrri plötu.

Karlmaður í Flórída hefur verið dæmdur í lífstíðarfangelsi fyrir að myrða táning vegna þess að hann spilaði tónlist of hátt að mati mannsins. Forsaga málsins er sú að árið 2012 hafi Michael Dunn verið að keyra í gegnum bæinn Jacksonville í Flórída ásamt kærustu sinni í þeim tilgangi að fara í brúðkaup sonar síns. Þau stoppuðu fyrir utan búð þar sem hópur af unglingum var í bíl á sama bílastæði. Dunn bað þá um að lækka í tónlistinni og eftir stutt rifrildi dró hann upp bysssu og skaut hinn 17 ára gamla Jordan Davis til bana. Michael Dunn á ekki möguleika á reynslulausn.

Nýja platan með Slipknot kemur út í dag en platan sem hefur fengið nafnið 5: The Gray Chapter“ er þeirra fyrsta síðan að bassaleikarinn Paul Grey lést og trommarinn Joey Jordison sagði skilið við sveitina.

Í Straumi í kvöld geta hlustendur heyrt ný lög frá Bonobo, Deerhoof, ...And You Will Know Us By the Trail of Dead, Parquet Courts, Chance The Rapper og mörgum öðrum en Straumur er á dagskrá klukkan 23:00 í kvöld.