Robin Wright og Sam Worthington í Everest

Leikaranir Robin Wright og Sam Worthington hafa bæst í leikarahóp bíómyndarinnar Everest sem Baltasar Kormákur leikstýrir. Kvikmyndavefurinn Deadline segir frá þessu. 

Tökur á myndinni fara fram þessa dagana í Róm og bætast þau Wright og Worthington við einvala leikaralið myndarinnar.

Jake Gyllenhall, John Hawkes, Josh Brolin, Jason Clarke og Emily Watson eru meðal leikara sem og okkar eigin Ingvar E. Sigurðsson.

Robin Wright er í sviðsljósinu þessa dagana fyrir hlutverk sitt í sjónvarpsþáttaröðinni vinsælu House of Cards á meðan Worthington er hvað þekktastur fyrir hlutverk sitt í myndinni Avatar. 

Everest er byggð á bókinni Into Thin Air eftir rithöfundinn og fjallagarpinn Jon Krakauer. Segir hún frá hörmungaratburðum sem áttu sér stað á Everestfjalli árið 1996 þar sem átta fjallgöngumenn fórust.

Fyrirhuguð frumsýning á myndinni er haustið 2015.